香港文匯報訊（記者 梁靜儀）19位香港小姐候選佳麗前日到愉景灣進行特訓，並分為音樂劇及舞蹈兩組，其中14位佳麗昨日接受導師趙增熹及麥秋成的音樂劇訓練，出名嚴厲的趙增熹更狠批佳麗唱功欠奉及「唔啱音」，希望用一個月時間可以睇到奇跡出現，麥秋成亦希望有神跡出現。

趙增熹受訪時皺着眉表示聽過佳麗試唱後，覺得她們在音樂劇部分要唱、又要跳及演，而唱歌部分好艱巨，問到可有佳麗五音不全？他說：「不如你問有冇人唱得啱音啦，有1個半個唱啱音，都仲有1個月時間畀佢哋追嘅，希望可以睇到一個好大嘅奇跡。」他自言出名嚴厲，所以佳麗見到他時都很少出聲，希望她們有一個很大的進步。他又苦笑說：「基本上可以話係監製整蠱我同整蠱佢自己，如1個月後可以做到成績出來，成功感都好大。（可有忍唔住鬧人？）我唔覺得我有鬧人，只係大聲啲講出我嘅要求，所以我間中至出現，（係咪驚教到嘔血？）盡力而為，應該冇事嘅。」

麥秋成笑言聽到一班女仔唱歌時的節奏感，已經感到一額汗，因為節奏感同跳舞有關，她們愈唱愈快，希望用一些道具去幫助她們，他說：「始終唱加跳其實幾難及辛苦，又要記歌詞、啱音又要跳得準，對佢哋同我來講都係一個挑戰，希望喺鞭策下有神跡出現。」問到教佳麗跳舞前，可要問准太太湯怡？他笑說：「唔使，有咩人可以fight得贏佢，不過，我都請了一個女助手幫手，始終跳舞有肢體動作會有身體接觸。」

陳瑞菱怕被誤會博同情

3號陳瑞菱自言喜歡唱歌，更透露跟過麥潔文學唱歌，但沒有參加過歌唱比賽，而且已經有一兩年冇練習過，不過，對於自己都有信心。問到可覺得導師嚴厲？她賣口乖地說：「嚴師出高徒，佢都係善意批評。」

昨日一眾佳麗以露腰運動裝現身，她的腹部之前因手術留下一條長疤痕，雖搽上了遮瑕膏，但仍十分明顯，而她亦大方表示已經接受了疤痕：「佢（指疤痕）提醒我帶出正能量畀大家，同更加珍惜生命，我亦冇因新聞曝光後首次露疤感到有壓力，只係有段時間唔想畀人知呢件事，唔想佢哋以為我博同情。今次都冇諗過大家會知。」她透露已開始去做激光淡疤，預計要做四五次療程，未知決賽前可會見效，她笑說：「好彩媽咪做美容，但我都要畀工錢，只係收平啲。」

9號陳銘鳳和10號何思懿在佳麗的嗜好欄上均填上唱歌，陳銘鳳自言未真正接受過專業唱歌練習，都希望可以提升自己的唱功，亦覺得自己有很大進步空間。何思懿笑指平時喜歡唱K，但距離專業仍有段距離，她笑說：「有朋友讚我唱得唔錯，但經過今（昨）日，咩信心都冇，但會繼續努力，（如何創造奇跡？）我哋都會盡力，雖然效果未如理想，相信之後再練習，應該會有進步。」她又讚3號陳瑞菱聲底厚，唱英文歌好聽。

問到今次外景拍攝可辛苦？何思懿直言行程辛苦，前一晚凌晨兩點才睡覺，翌日清晨6點便要起床，要保持身段又不敢吃東西，但沒有後悔參選。陳銘鳳則示開心認識到一班優秀的朋友，令她的廣東話大有進步。

8號林鈺洧開心透露比起第三次面試時已瘦了4kg，但仍想減多3、4kg，雖然要減肥，但想減得健康，所以都有照進食及有做運動。13號邢慧敏指林鈺洧趁小休時間就做Sit up，其他佳麗都笑她：「使唔使咁勤力呀。」林鈺洧就指邢慧敏天生瘦底不會明白。說到她身型纖瘦不用減肥？她說：「朋友話我上鏡太瘦，做Model都OK，但上鏡就要肥返少少。」

談到對昨日受訓的表現，邢慧敏自言未試過上台唱歌及跳舞表演， 對她來說是好大挑戰，她笑說：「覺得自己唱得都OK嘅 ，未到五音不全，仲有好大進步空間。」林鈺洧就稱未表演過唱歌， 所以都想挑戰自己：「平日都係做開Model影相行Catwalk，所以聽到自己開聲都有少少懷疑自己， 但我都會繼續努力唱好佢，（揸住支咪有冇手震？）咁又冇， 淨係諗老師唔好鬧我。」問到她們可覺得趙增熹老師好嚴厲？邢慧敏坦言有些佳麗都好驚上堂被老師鬧，但嚴師出高徒。