香港文匯報訊（記者 梁靜儀）張秀文、鄭衍峰、鄧卓殷、葉蒨文、關宛珊、黎芷珊及譚玉瑛等，昨日出席TVB全新節目《答得快 好世界》拜神儀式及進行錄影。

節目主持之一的張秀文去年底閃嫁金融才俊王大權（Billy）後，休息大半年才正式復工，她笑言：「今次係婚後首個工作，我形容係久休復出，休息呢段時間忙於做人妻，打理屋企，不過每次老公見我拎塊牛扒入廚，就話咁大油煙唔好煮，老公係覺得我煮得唔好，所以婚後我未煮過一餐飯畀老公食，不過我有照顧佢起居飲食。」為了令老公刮目相看，她打算之後報讀烹飪課程。

張秀文又直言已準備好做媽咪，都想盡快生BB，說到之前李居明大師提供方位及時辰給她造人，她說：「要凌晨3至5點，老公太早睡早起，對佢嚟講好困難，唔忍心叫醒佢，唔會迫佢，如果有一日老公喺凌晨3至5點時好清醒就係時機，個天要畀個BB我，𠵱家等緊時機來臨。」說到她可出埠旅行，有時差便容易成其好事，秀文表示婚後還未度蜜月及未擺酒，希望待疫情過去可以請多些朋友。

怕答不到小學問題

鄧卓殷被問到之前有傳其男友郭子豪買戒指向她求婚？鄧卓殷否認有此事，並笑說：「我都係睇報章新聞同喺朋友口中先知呢件事，冇發生過呢件事，（是否報道出來後，男友要改變計劃？）我唔知，如果再有報道就冇驚喜。（期待驚喜？）順其自然，我冇幻想過。」問到如果男友求婚可會答允？她就稱：「到時先算，要睇誠意、現場環境同心情，以前會想30歲前結婚，但𠵱家覺得同結婚仲有段距離，覺得自己仲後生，所以冇去諗。」

另外，曾入選港姐30強的葉蒨文，自嘲美貌及智慧都不成，屬反面教材：「我唔係sell學歷，我係反面教材，小朋友唔好似我咁唔讀書，所以打算擔當筋肉人，做運動練習快手撳掣。」身為尖子的鄧卓殷，表示自己精通英語、普通話及理科，但都擔心答不到小學程度的問題會「好瘀」。