（有片）張敬軒疫情停騷一度失眠　直言欲請張竹君睇騷

大公文匯全媒體記者陳惠芳報道：張敬軒THE NEXT20演唱會，進入第4場，軒仔連續三晚都同觀眾訴心聲，坦言不想再於張竹君醫生口中聽到他的名字。

軒仔於演唱會上跟觀眾交流，其實今次疫情緩和補場，他有跟公司表達意見，「不如我哋搵過個時間再開啦，我真係唔想再喺張醫生個口到聽到『張敬軒』呢三個字。我哋同事係咪可以送張飛俾張醫生睇？佢呢三年都好辛苦。我又好擔心明明大家好開心睇演唱會，我哋又好辛苦做好個製作，但係好多不明因素之下，令大家有人生安全憂慮。一月份暫停個騷後，我好多晚都好難瞓得着。公司同我講，退飛觀眾唔夠3%，我喺呢度真係要多謝大家，多謝每位觀眾喺呢二十年裏面，對我包容同愛。」

第二晚及第三晚，軒仔請來吳林峰及洪嘉豪做嘉賓，第四晚更請樂隊DEAR JANE。洪嘉豪上台時向軒仔表白沒有張敬軒就不會有洪嘉豪，他更特別送 上鮮花送感謝。軒仔接過花就口多多話，「長話短說啦，你送花俾我，我都要回個禮。」然後將跟隨自己多年的紅色咪送嘉豪。