重開紅館騷 每場演出不留力 嘉賓林明禎送榴槤給張敬軒補身

香港文匯報訊（記者 李思穎）張敬軒（軒仔）去年底舉行的18場跨年紅館騷，於1月初時因疫情而暫停，剩下的8場演出要延期舉行。近日隨着疫情回穩，紅館可以重開，軒仔為報答粉絲堅持不退票，最終演出決定由8場變16場，以作回報。軒仔的補場個唱於前晚重新啟動，因應現時政府的防疫措施，場館只許五成觀眾入座，再度登上紅館的軒仔百感交集，更加珍惜疫情後與歌迷的共聚時光，揚言每晚當正尾場不留力演出，務求為大家帶來開心一夜。軒仔被指經常要吃白麵包，「大馬女神」林明禎在台上特別送上榴槤，幫他補充營養。

當晚前來捧場的圈中人有泳兒、吳浩康、艾妮、英皇娛樂集團行政總裁許佩斯、英皇集團董事會副主席楊政龍等，頭場演出嘉賓則有陳柏宇及「大馬女神」林明禎，軒仔於一片歡呼聲中以水晶燈王子造型現身，唱畢《Do What You Want》及《騷靈情歌》後，就向四面觀眾深深鞠躬致謝，他略有感觸地說：「之前諗住做五場休兩日，好開心啦！點知今次做十場休了四個月！多謝每一位觀眾朋友咁支持我，多謝大家，今晚得五成觀眾，但已經是這個時候的Full House（滿座）喇！真係百感交集！這四個月發生好多事，我哋身邊，我哋香港都係，大家可以再坐返喺呢度，我要懷住好感恩的心去努力唱好今晚每一首歌，我決定這十六場演唱會，每一場都當尾場去做。」

收「紙紮鐘」百無禁忌

現場有歌迷高舉一個「閃令令」紙紮牌，軒仔目睹後忍不住指向該歌迷笑說：「又係你呀！這位朋友每次整出好配合紅磡主題的燈牌畀我！想問中間識閃個嚿黃色係咩？鐘？你送個鐘畀我？紙紮鐘？你真係好嘢！就憑你這份創意，我真係要回禮畀你，就是我私人家屬票，送兩張尾場山頂位畀你！工作人員幫我化走這個牌就得，真的大吉利是，這些紙紮禮物一年收一次夠啦，百無禁忌！」全場觀眾捧腹大笑。

先出場的嘉賓「大馬女神」林明禎以跌膊長裙現身，全場嘩聲四起，明禎報以甜美笑容冧爆歌迷，她謂：「好緊張，我何德何能站上紅館舞台跟你合唱？今天是我第一次穿這種裙，今日我是最幸福女子。」軒仔即回話：「我何德何能請到新一代女神同我合唱就真！你今晚靚到像美人魚。」

明禎自爆有留意軒仔在社交平台的分享，笑說經常見軒仔吃白麵包，營養不良，所以特別從大馬帶來貓山王榴槤一個，叫軒仔早餐可以食麵包加榴槤，才夠營養。軒仔反問：「我平日買的都是已經打開了的榴槤，你咁樣畀我，我唔知點開喎。」女神馬上發功：「我可以去幫你開呀，你打電話畀我，或者text我……」軒仔又大讚明禎一雙明眸長期水汪汪，難怪被封女神，而女神就乖巧回話： 「我係見到你才會這樣……」觀眾大笑，繼而兩人合唱《只是太愛你》。

合唱《斷點》與陳柏宇可成組合

而另一位嘉賓陳柏宇（Jason）則與軒仔合唱《斷點》，軒仔謂假如將來有機會做組合，一定會揀與Jason合作，因為二人相識多年，曾經更是同一位監製作歌，當時監製已指兩人聲線非常之合拍。而Jason揀唱軒仔的《斷點》，是因未入行前，參加歌唱比賽後得到錄音機會第一次錄的歌，特別有紀念價值。軒仔聞言即表示多謝：「多謝你二十年前已經揀咗我。」完騷後，歌迷欲罷不能，狂叫安歌，軒仔果真當尾場做法，再度上台為觀眾獻唱，結束完美一夜。

消耗了整晚體力，軒仔便回家享用宵夜，詎料眼前幾乎清一色是流質食物，軒仔搞笑說：「我媽遙距控制，係咪當我冇牙。」他在社交網亦放上一張搞笑照片，是他背向鏡頭，雙手擺放在前面，如像小便的動作，軒仔留言：「荒山野嶺冇廁所搵個Friend幫手睇水」，而在他身旁Jason的對白：「喂，你屙完未？」認真抵死。