香港文匯報訊（記者 梁靜儀）英皇娛樂昨日舉行《英皇娛樂元宇宙世界》發布會，正式宣布進軍「元宇宙」，發布會以線上形式進行，並邀得張敬軒（軒仔）、英皇娛樂集團行政總裁許佩斯及VAR LIVE旗下MetaTimes主席楊全盛出席，當中創造的全新虛擬形象「HC」亦首度於發布會中以特別嘉賓身份亮相，軒仔更大讚HC很似自己，有他的智慧及鬼馬，似自己小時候般跳脫。軒仔還透露將來會於元宇宙舉行演唱會。

英皇娛樂是香港首家於The Sandbox布局構建虛擬音樂娛樂體驗空間的娛樂公司，發布會以線上形式舉行，首次融合XR（延展實境）技術，虛擬與現實世界結合。軒仔更是首位建立元宇宙空間虛擬社區「Hinsland」的藝人。「Hinsland」搭建了多個場景，包括HC大宅、Fans Club、「櫻花樹下」、甚至軒仔的「遮遮」都會出現，將虛擬與現實世界結合在一起。

一向喜歡新科技的軒仔說：「喺我角度Hinsland可以話係一個小烏托邦，將現實生活中嘅我，好玩嘅嘢、新玩具同大家分享，例如我一啲收藏、歌曲等，可以即刻擺上去，可以用數碼藝術形式呈現出嚟，唔單止係欣賞咁簡單，係一齊去Experience（體驗）。」發布會上更首次透過元宇宙形式發布軒仔的新歌《元宇宙之戀》。

軒仔又稱最想於元宇宙做現實做不到的事：「將已經唔喺度嘅小動物重逢，同埋可能我係獨子關係，好細個已好識得自己同自己玩，我create（創造）咗好多唔同角色，我都會將佢哋擺喺 Hinsland。」問到軒仔會否於元宇宙舉行演唱會，又或是將元宇宙概念帶到即將舉行的演唱會？軒仔說：「未來一定會，我好想將呢個騷擺落元宇宙，但今次真係回歸返上一個章節先，做返個實體形式演唱會先。」

問到為何會揀軒仔做打頭陣的歌手？英皇娛樂集團行政總裁許佩斯表示與團隊有這個構思時，不約而同望住軒仔的相片，因為軒仔好Open，又是一個收藏家，又鬼馬及幻想力豐富，所以不作他想，團隊開會不到5分鐘便可散會。據知Hinsland將於暑假推出，問到今次投資數目？許佩斯說：「今次投資咗好幾個7位數，但好值得。」

16場演唱會邀全新嘉賓

即將要舉行16場演唱會，軒仔坦言今次由原本要演出8場突然變16場，對其體力及表現也是個挑戰，為保持最佳狀態，軒仔透露每日會多飲水及睡足8小時，但就不會特別操練，他說：「我要對得住之前買咗飛嘅朋友，表演水準要同之前嘅完全一樣。」問到今次補場演唱會有何驚喜？軒仔笑說：「我已過咗騷肌年紀，最多露手臂，唔知大家有冇見到我有返條Jawline（下頜輪廓），因為𠵱家用返168斷食法，令到皮膚同精神狀態都精神返，好多謝『整容級」化妝師，令我重現V面效果。」他謂今次演唱會的流程基本上不變，但可能會在細緻位及舞台上的編排有一個升級版，還有16場嘉賓都是全新，相信觀眾會有新鮮感。

談到有Fans投訴演唱會對換飛問題，問到軒仔如何安撫Fans？軒仔說：「第一日換飛時，又落雨及降溫，知道有朋友排隊排了三四個鐘，所以翌日立即作出新的調整及人流管理，等大家盡量唔使等太耐，相信整個疫情當中，好多同生活上處境一樣，新的挑戰來到就用新的方法處理，我哋都係摸索中，好多謝大家嘅意見。」

許佩斯就補充：「我哋都唔想愛軒仔嘅歌迷要等得好耐，所以都好突然我哋攞得返個期就安排所有嘢，中間某程度係好消息，因為疫情不斷好轉，我哋就跟住政府個政策去盡量完善件事，但我必須要代表公司好多謝好多謝軒仔嘅Fans，佢哋真係好有心好有耐性同好好人，到今次我哋可以將人數擴寬返，可以令到之後嘅人，19號去睇騷嘅觀眾，唔需要再去換飛，呢個亦都係一件好嘅事，而今（昨）日換飛嘅都係19號之前嘅，政府仍然維持緊50%座位，呢個我哋就改變唔到。」