香港文匯報訊（記者 梁靜儀）由黃百鳴監製、林德祿執導，古天樂、張智霖及鄭嘉穎主演的反貪系列電影《G風暴》將於今年除夕12月31日上映。鄭嘉穎受訪時透露電影拍攝期間曾遇外籍人士借醉挑釁，他忍不住上前理論，更幾乎發火動粗。

該電影系列橫跨7年，先後打造了《Z風暴》、《S風暴》、《L風暴》、《P風暴》及《G風暴》合共5集，終極篇《G風暴》，G代表G4外，亦是廉政公署內部的G小組，即臥底小組，今集的主軸跨國販賣人口案件，並會有不少貨櫃場槍戰、公路飛車追逐、爆炸等槍林彈雨畫面。

嘉穎之前有份參與《L風暴》、《P風暴》演出，來到最終章，問到可有不捨？嘉穎認為是個完美的完結：「任何事情幾好都有完結一日，但有完結才有新開始。」戲中嘉穎飾演ICAC調查員，要面對和戲中弟弟黃宗澤（Bosco）的親情與公義掙扎兩難局面。嘉穎表示今集較少開槍場面，但亦有動作場面，其中在中環蘭桂坊拍攝打鬥追逐場面時，更發生了小插曲，令他甚為難忘，他說：「拍攝時仲未有疫情，有啲外籍醉酒客鬧事，初時佢哋上前八卦，我都客客氣氣，但後來佢哋用英文粗口鬧人，有啲挑釁成分，大家啲火開始嚟，最終我都忍唔住氣同佢哋理論，用咗啲英文助語詞，仲差啲加動作場面，要啲武師㩒住我，我諗佢哋驚之後拍唔到，阻住佢哋收工啫，最後都順利完成，冇郁手嘅。」當時火遮眼的嘉穎，如今回想起都覺得自己衝動了，他笑說：「經一事長一智，下次再發生，我應該走埋一邊，等佢哋搞清楚先至再埋位，（你都仲有火？）係囉，幾廿歲都仲有，一撻就着。」

嘉穎承認自己近十年的改變很大，以前他會為了被跟蹤偷拍而發火，現在除非是影響到小朋友他才會容易動怒：「因為小朋友係冇錯，又唔知發生咩事，保護小朋友係父母責任。」育有兩名兒子的嘉穎，認為明白作為父母身教的重要性，故說話前都會檢視自己的言行，他說：「有次我揸車接大仔放學，隔離車唔打燈Cut線，我只係講咗句『打燈啦』，跟住大仔即刻學我語氣講『打燈啦』，我心諗好彩冇加助語詞啫，呢次之後我講嘢好小心。」

遇合適題材願操肌

事事以家庭為首的嘉穎，現時接拍動作片又可會較錫身？嘉穎說：「呢行只有拍，一係就唔拍，冇話唔辛苦，唔打鬥，任何嘅戲多多少少都有動作場面，就算我做兒科醫生都要追賊，冇得避免，只可以自己小心啲，做到嘅一定做，（有哪類片種不會接拍？）三級片唔會接，自問冇咁嘅能力，（如果要你好似張家輝、張振朗般操到好大隻呢？）如果劇本好吸引都會試一次，但如果要操到好似張家輝咁，係好有挑戰性，家輝背後要付出好多，張振朗仲好啲，因為佢仲後生，佢身形真係操得好靚。（可想試吓？）去到某個年紀，要操到咁要付出雙倍代價同埋真係好傷身，（可想試吓爆肌？）有適合題材先啦。」

從影多年，嘉穎演過不少角色，他最想挑戰自傳式電影，演一個人物的一生，但就未想過演哪個傳奇人物。唱歌、拍戲、舞台劇都試過的嘉穎，亦先後兩度奪得電視台「最佳男主角」獎，問到他現時在演藝工作上仍有什麼想追求？他認為自己還未算合格：「近4年我都係以拍電影為主，但未係合格，未有一部代表性作品，我都係革命尚未成功，還需努力，演員係好被動，永遠唔會知下一個角色將會接觸到咩，所以都係不停落注，學杜琪峯導演所講『你一日唔離開賭枱，一日仲有機會贏』，但唔知幾時同會唔會，到退休嗰日就會派彩，可能有或者冇，起碼我不停試過，都無憾。」

攝影： 梁靜儀

服裝：Lane Crawford

化妝：Henry Li

髮型：Sue Cheung

場地：酒鍋（V Point）