香港文匯報訊（記者 李思穎）周潤發（發哥）追求「貼地」生活，習慣行山、幫襯平民食店、去街市買餸，親切形象深入民心，香港市民早已視發哥為好朋友，若然有幸遇到發哥必定第一時間集郵合照，亦是不少人夢寐以求的「彩蛋」，今次輪到陳家樂「中彩」！入行18年的家樂終於有機會遇上偶像發哥，他即時化身小粉絲和發哥合照，更獲對方體貼對待，家樂開心得如像中六合彩，興奮嚷「阿媽我得咗啦」！

家樂在社交平台分享與發哥的兩張「清與矇」合照，他謂：「Omg！（我的天！）頭先偷食燒鵝嘅時候！後面突然有一班行山客叫嘢食，突然佢哋問『發哥，想食咩？』聽完之後，我個腦即刻高速運轉！行山，發哥，行山，發哥，行山，發哥，我計算到，佢係賭神發哥嘅機會率一定大過同花順！」家樂立刻轉頭一望，果然見到是偶像發哥，難掩喜悅心情：「入行咁耐，我終於可以見到發哥啦！我即刻膽粗粗問發哥可唔可以影相，影完之後，佢仲見我鏡頭花咗，影到矇查查，再用佢電話同我影，再傳返畀我，太貼心啦！」發哥的窩心舉動，直把家樂仔融化，他樂滿天說：「開心過中六合彩，媽，我得咗啦！」黃建東搞笑留言：「羨慕到流血鼻」。