香港文匯報訊 周柏豪早前為劇集《把關者們》主題曲《過關》拍攝 MV，導演今次安排在一間荒廢了的釀酒廠拍攝，現場陰森詭秘，本身有幽閉恐懼症的柏豪唯有頂硬上，他提到：「近期拍另一部新劇《旁觀者》的水底戲時曾經發作，身體出現風癩同紅疹，搞到要睇醫生打針食藥，不過已經決定搵方法對付。我本身都畏高，之前想要克服就去跳傘，今次就會去學潛水，不過以我呢個情況，相信需要導師嘅特別處理。」

柏豪剛完成新劇的拍攝，終於有時間可以陪伴家人，及安排私人工作，除了學潛水之外，仲會學電單車，他笑言：「人大咗覺得揸電單車好有型，而且覺得拍戲都會有用，就趁呢個空當去增值一下，不過就當然以安全為主。」

呢首新歌雖然係一首紀律部隊劇集的主題曲，不過柏豪就認為新歌曲風非常有神秘感，歌詞亦都寫出了海關人員工作上的故事，仲有好多唔同伏線在當中，而且編曲係自己合作無間的好兄弟周錫漢，所以好鍾意。劇集入面有好多自己的好朋友，譬如：袁偉豪及王敏奕，好期待睇佢哋的演出。