香港文匯報訊（記者 梁靜儀）林作與鍾培生的百萬拳賽已於上星期舉行，林作雖然被擊敗，但就可得到鍾培生給他的百萬出場費，昨日林作在個人社交平台上載手持支票的相片，並留言：「認真的，多謝鍾生。」不過支票上的銀碼只有港幣943,440元，據悉是扣除了林作購買拳賽門票的錢後的銀碼。

前晚林作偕同女友到灣仔接受直播訪問，他表示收到鍾培生給他的支票，作為日前拳賽出場費，他說：「係期票，應該星期四（23日）先兌現，（點解會係期票？）佢有講因佢啲錢要轉過來，有錢人啲錢係比較分得散啲，兌現後第一件事想做係影返張相，話畀大家聽呢個錢真係袋袋平安喇，（你擔心兌現唔到？）鍾生（鍾培生）咁有錢點會兌現唔到？始終未落袋總有啲不安全感。」問到如何運用這筆錢？林作表示請裕美食飯或者儲起來買保險。

裕美卻嫌男友請食飯行貨，並笑說：「識佢第一日已知佢孤寒，冇嘢可以『鑿』佢，呢排仲要我車出車入，油錢都蝕埋。」笑問她為何還跟對方時？林作即插口說：「你搞錯咗喇，係我跟佢，佢好旺夫，（點報答女友？）女友物質上都有晒，家每個月搵錢多過我好多。」

談到傷勢，他表示只是擦傷都唔痛，所以沒去睇醫生，由它自己好返。裕美亦稱估不到男友的傷勢如此快痊癒。笑問到豈不是冇得咀嘴？裕美笑說：「不嬲都冇，對佢冇乜興趣。」林作又稱如果價錢合適的話，會再考慮再上擂台打拳：「因為100萬打場拳自己都覺得係奢侈，我願意考慮，（如果有人贊助裕美打你呢？）有人肯畀我100萬，我跪低畀佢打，總之有錢收，好多嘢都肯做。」

否認涉轉播賽事

談到裕美被指有不雅片流出，二人表示至今仍未睇過短片，問到林作沒興趣睇嗎？他說：「我同佢（裕美）相處耐咗都見慣，所以都唔係太大興趣。」當問到他以前可有拍過這類影片時，初時林作聲稱以前與「舊愛」拍好多，希望將美好一面留底，但就沒有裕美份，當記者再追問之下，他即改口說：「我講笑啫，（有冇拍過私藏親密片？）我冇拍呢啲。」裕美強調自己沒有拍過不雅片：「我梗係冇拍過，但好神奇地喺佢（林作）上台打拳前一兩個鐘我收到記者電話，嗰時間太詭異，令我覺得有人想搞事，可能想影響佢心情，我冇睇過條片，只係睇過cap圖。」

另外，有指林作的保險經紀下屬，因在網上直播拳賽要向有獨家直播權的鍾培生作出賠償，林作聲稱不關他事，並說：「我下屬同鍾生係認識嘅，相信佢哋私底下有傾返件事，而我理解佢兩個係settle得到，要做嘅賠償，無論金錢或肉體上嘅賠償已經有個定案，應該私了咗，亦都唔關我事。」