香港文匯報訊（記者 梁靜儀）4位港姐得獎佳麗，包括冠軍宋宛穎、亞軍梁凱晴、季軍暨友誼小姐邵初，以及最上鏡小姐楊培琳，昨日在電視城會見傳媒，並由TVB主席許濤頒獎。TVB一併公布收視成績，平均收視26.1點，最高收視則有27.4點，是張學友壓軸演出環節，約有180萬觀眾收睇。志偉特別感謝學友為市民帶來美好回憶。

冠軍宋宛穎表示比賽後返屋企慶祝，又收到很多朋友祝賀短訊，要逐一回覆，清晨5點才去睡，睡了個多小時便起床，感覺仍在夢中未醒。她表示因為家人都在澳門，所以暫住在契爺屋企，當選後都打算搵屋搬。她又謂得獎後致電給身在澳門的媽咪報喜，媽咪更激動到喊，可能是覺得後繼有人，又為她過去幾個月盡了最大努力而感動，及替她有好成績開心。宋宛穎指決賽當晚媽咪有收看電視，指她問答環節不及上次表現好，不過都好滿意結果。問到媽咪會否來港跟她慶祝？宋宛穎笑說：「媽咪呢3個月都好努力keep fit，為咗鞭策我。如果佢嚟香港都會食餐好的慶祝。」出身選美世家的她又笑言之後可能會同表姨媽及媽咪，齊齊戴上后冠影一輯靚相。

亞軍梁凱晴亦表示賽後回覆朋友的祝賀短訊，清晨四五點才睡，感到好攰。不過之後都會相約一班佳麗打邊爐，中秋一起賞月食月餅。

志偉澄清非邵初「後台」

「雙料」得主邵初，盛傳因有後台撐腰，「官威」大到連無綫副總經理曾志偉都要幫手揸機替她跟父母影合照，邵初解釋當晚父母沒有到場睇騷，其實是表姐同其男友，對這個影相畫面沒印象。

此時無綫副總經理曾志偉突然到場，並幫口澄清只是誤會，他笑說：「如果我係後台，做到咁出面都係得第3，咁就慘啦！我幫手揸機影相嗰個係百貨公司老闆，係贊助商，（你識唔識邵初父母？）姓邵我只係識邵逸夫，真係唔識呢位邵生（邵初爸爸）。」

獲志偉親自落場解圍的邵初對此說：「曾先生只係講出真相，其實我媽咪都唔識佢（志偉），但佢幫我澄清，真係好好！」對於傳她得兩個獎是因為有後台，可會覺得不公？她說：「第一個獎（友誼小姐）係佳麗頒畀我，唔關後台事，今年啲評判評分都好深思熟慮，12個女仔啲分好相近，大家都做得好好。（網民戥關楓馨冇獎唔抵？）我覺得佢做得好好，我哋係好朋友，各花入各眼好正常，喺我心目中佢好靚，叫我揀都好難揀。」

港姐競選前晚已圓滿結束，昨日公布收視成績，平均收視26.1點，最高收視則有27.4點，是張學友的壓軸演出環節，約有180萬觀眾收睇。志偉表示是好難得的收視，公司上下都好開心，沒有白費大家連日來的辛苦。

對於前晚在完騷後，志偉被拍到走落台跟工作人員對話，以及神情嚴肅向幾位港姐司儀訓話，他否認有「黑面」：「當時只係緊張，以及現場打燈打得唔夠光，影得黑咗少少。」他解釋因為當時見到工作人員做手勢要司儀拉長時間，便立刻落去睇發生什麼事：「原來係因為有4位落選佳麗換錯衫，趕唔切出場，其實我覺得可以照頒，因為都唔係嗰4個得獎，同埋觀眾都唔知要邀請返嗰4位出嚟，（但司儀講咗12位佳麗出場？）唔會衰得過喺度等嚟等去。」

志偉又指以前做司儀，也曾試過讀錯入圍佳麗名單，將淘汰出局的讀成入圍，變成多了兩個佳麗入圍，但對賽果都不會有影響。他記得當年肥姐（沈殿霞）都有教過，不要理會台下工作人員的手勢，最重要淡定，唔好自亂陣腳。他又大讚丁子朗及DO姐做得好，至於陳凱琳（Grace）的表現，志偉就說：「其實Grace喺staycation嗰段時間，佢一個人去對住班佳麗，表現得非常好，前晚可能台上有DO姐，怕自己身份唔適合講太多，拘謹咗。」

給節目超過90分非常滿意

對於今年港姐節目，志偉非常滿意，更給節目94至96分，他表示收到很多電話及很多不同評語，當晚在電視城留至凌晨3點才離開，因為跟幾位司儀即場檢討，任何節目做得不好都要檢討，做得好更加要檢討。至於工作人員就慶功聚餐後才作檢討？問到是否「照肺」？志偉搞笑說：「食飽照唔到肺，照肺要餓幾個鐘。」他又指任何Live騷實有瑕疵，冇瑕疵就是錄影。

今次邀請到張學友擔任表演嘉賓，志偉表示翌日早上已傳短訊給學友，多謝他帶給廣大市民一個美好回憶，以及給TVB一劑強心針，有機會都想邀請他出席慶功宴，因為很多工作人員都想跟他合照，如果收5元一張都發達。問到之後會否叫學友多上節目？志偉說：「當然希望可以邀請佢上節目表演，但學友唔係用錢就可以打動，邊個夠佢有錢？佢開過200幾場巡迴演唱。」