候選港姐分4組龍舟大戰 朱晨麗不諳水性當鼓手 驚到腳震

香港文匯報訊（記者 李思穎）無綫《2021香港小姐競選》的準決賽及決賽將於本月22日及9月12日舉行，今年突破性在賽前以真人騷《We Miss Hong Kong STAY-cation晉級賽》進行，從28位參賽者中淘汰剩20位晉身賽事，有關節目亦已定於下周一（9日）開始播出。候選港姐分4組進行龍舟Battle，為了支持一眾師妹，不諳水性的師姐朱晨麗及張秀文亦硬着頭皮為組員豁出去做鼓手，朱晨麗驚到腳震。

在真人騷晉級賽中，28位入圍佳麗獲安排入住西貢一間酒店，在8位師姐領隊帶領下分成紅、綠、橙及粉紅4組，展開為期11天的「Stay Battle」，決定哪20位佳麗可Stay至最後。

其中的龍舟Battle，除了佳麗們盡全力爭取好成績，不諳水性的師姐朱晨麗及張秀文亦硬着頭皮為組員豁出去做鼓手，朱晨麗表示：「我真係腳震，因為我好怕水，但我跳開舞可能拍子（感）好啲，所以我舉手打鼓。」張嘉兒則指龍舟Battle有助建立組員間的團結：「希望佢哋可以藉此更加認識對方。」

粉紅組佳麗包括王嫿嫿、余曉蕙、宋宛穎、張嘉倩、戴佳敏、劉珍寶、朱綽盈均感激師姐領隊劉倩婷及張秀文照顧周到：「Sandy（倩婷）師姐會錄低我哋嘅姿勢，指導我哋做番正確動作；Sammi（秀文）師姐會喺前線指導我哋。」嘉兒及馮盈盈帶領的橙組馬祖雁、陳聖瑜、王嘉慧、莫韻諰、梁凱晴、盧淑儀、伍韻婷表示很開心獲師姐送贈小禮物：「佢哋希望幫到我哋比賽，因為我哋都好怕曬，上面仲印咗我哋team名。」

師姐師妹培養好感情

經過長達11天的相處，一班師姐師妹培養了很好的感情，盈盈坦言佩服今屆參賽港姐：「雖然嗰時我哋選嘅時候都要外景、拍攝時間長，但今次因為係真人騷，個時間再長啲，同埋連休息時都要保持警覺，就算瞌一瞌都有壓力同要保持住個狀態。」她又謂與嘉兒都為師妹組員深感驕傲：「張嘉兒話班女仔真係好勁，如果畀着我哋當年肯定呢樣嗰樣都做唔到。」向海嵐與曹敏莉亦對應屆佳麗讚不絕口，向海嵐笑指自己是緊張型媽咪：「我哋同啲組員嘅Bonding好強，就算我哋唔需要喺現場，見到工作人員傳來組員啲相，我哋即刻導師上身，佢坐得唔夠直呀！呢隻腳伸得唔夠長呀，改正佢哋。」曹敏莉則指會為師妹度身訂做「參選貼士」：「我哋係希望將每一個最好嘅一面都展現出嚟！例如有啲企得唔夠直、有啲唔敢講嘢，我哋都希望有小貼士幫到佢哋。」