鍾情演帶喜感的小男人 諾懿出道將20年 慶幸常遇良師

香港文匯報訊（記者 梁靜儀）黎諾懿近日在劇集《刑偵日記》（刑偵）飾演重案組總督察江政勳，正如諾懿所形容，今次的製作團隊及演員都是「可遇不可求」，他就很享受整個拍攝過程。他表示自己演員的際遇很好，遇到很多好對手，其中鄭則仕更教曉他很多技巧。而他鍾情演帶有喜感的小男人角色，他自嘲皆因型不起來。

在《刑偵》劇中諾懿的角色為求上位而不擇手段，他覺得今次的角色，因要長期用腦去計算別人及想方設法爭取表現，外貌上相信會較蒼老，加上戲中他要面對不是善男信女的王浩信及袁偉豪，因而向監製提出將頭髮染白，結果卻「捉蟲」：「原來冇白頭髮嘅人將頭髮染白之後慢慢會變黃，拍完一個星期變咗『飛仔』，要keep住染，頭髮變得又脆又霉，一邊梳頭就一邊甩頭髮，好彩助手買咗包髮泥捽上去，再補染返少少先得。」

黑哥外形嚇人 實質有禮不講粗口

今次《刑偵》劇雲集了惠英紅、姜皓文、王浩信、袁偉豪與黃智雯等人，諾懿形容這個班底是「可遇不可求」十分難得，他最難忘有一場戲要侮辱袁偉豪，令他難堪，為求效果好，二人事前更自度戲份：「嗰場戲我要糟質袁偉豪，照頭淋佢咖啡，又捽佢塊面，捽到佢成塊面花晒，場戲一take過，我好鍾意，而我好欣賞呢個團隊係因為大家為咗效果好可以好配合，導演亦會放手畀我哋去做。」諾懿表示今次是他首次與姜皓文（黑哥）合作，初時他都被對方兇神惡煞的外形嚇怕，但很快就被他融化：「黑哥係一個好有禮貌嘅人，有禮貌到你怕，又唔會講『粗口』，反而我哋開工時都會講。」再次跟好戲的惠英紅（紅姐）合作，諾懿大讚紅姐眼晴有神：「紅姐就算放空都好，你睇到佢對眼係有戲，好難得遇到咁好嘅演員。」

經常有機會跟好戲之人合作的諾懿，慶幸從演以來每個階段都遇到良師，包括拍《街坊財神》結戲緣的鄭則仕（Kent哥）、《溏心風暴》的夏雨和李司棋、《鐵血保鏢》黎耀祥，位位都是好戲之人，他覺得這是一個演員的際遇和運氣，他感恩說：「拍《街》劇時佢（Kent）冇理過自己啲戲，長期都係顧我啲戲，教我好多嘢，今次拍住紅姐同黑哥兩位頂級演員，Kent教我啲嘢就可以用到落戲裏面，而今次紅姐同Kent哥一樣，唔係顧自己，係顧咗對家先，所以覺得飾演紅姐個女及王浩信妹妹嘅戴祖儀行運，遇到兩個好戲之人。」

認住家男形象有助事業

出道快將20年，諾懿演出過逾半百套劇集，由侍應、見習機師、廉政公署調查主任、重案組總督察都演過，不過他卻鍾情演帶有喜感的小男人角色，他自嘲皆因型唔起：「逢角色要我扮有型，扮偶像就死梗，因為觀眾唔鍾意，唔覺得我係扮緊有型，反而演《BB來了》嘅小男人葉致廷、《愛·回家》嘅馬壯，觀眾覺得我就係呢類型。」他回想起初出道拍《當四葉草碰上劍尖時》，一次與（已故）導演錢國偉（Wilson）傾偈就曾跟他說過：「Wilson話我一定要做笑戲，做啲輕鬆角色就得，家翻睇自己往史，例如《不懂撒嬌的女人》賤Han、馬壯、都係呢類角色，反而做正經角色就唔係好爆。」

無可否認，婚後的諾懿，好老公、好爸爸的形象令他成功入屋，加上近兩年在疫情之下，他主持網上節目《疫境廚神》、《今晚請客》等煮食節目，成功獲得不少觀眾支持，奠定其住家男形象，諾懿承認住家男形象對其事業不多不少都有幫助。笑問他是否終於搵到自己要走的路線？他卻說：「我仲未搵到㗎，我好想做王浩信，偶然都想扮吓型。」近年經常主持綜藝節目的諾懿，稍後將首次為綜藝節目《仨心友行2》擔任監製，節目亦是跟飲食有關，4歲的兒子黎峰睿（小春雞）亦會出鏡。

愛兒活躍 選讀國際學校

在傳統學校接受教育的諾懿，認為小朋友最緊要是開心，不用太早催谷，故安排兒子入讀國際學校：「我個仔比較活躍，我同太太覺得傳統學校唔適合個仔，同埋我覺得識人係好過識字，因為就算讀好多書都好，但唔識同人溝通，出來做事唔識同人相處，幾叻都冇用。」

不是在溫室中長大的諾懿又認為小朋友要跌過才知痛，他亦希望兒子早點體會到：「之前我拍個仔煮即食麵，好多人都話咁會好危險，我都認同家長擔心小朋友有意外係啱，小朋友亦都好寶貴，但若果咩都唔畀小朋友去嘗試，小朋友又點會成長呢？」