香港文匯報訊（記者 李思穎）薛家燕主持的電台節目《開心大派對》邀得新手爸爸林溥來（Patrick Sir）擔任嘉賓，而家燕姐亦於約一個月前抱孫榮升嫲嫲，兩人碰頭即雞啄唔斷，大談湊BB經，樂趣無窮。家燕姐與囝囝一家更是住得非常近，就在隔壁，家燕姐每逢外出前或回家後，第一時間想要見到的都是孫仔。

弄孫為樂的家燕姐最愛唱《月光光》氹孫仔瞓覺，問到有否效用時？她笑說：「暫時未吸收到。」至於Patrick Sir就透露約兩個月大的囝囝已戒掉夜奶，最近一次更破紀錄瞓了8個小時先醒，所以湊得好舒服，笑言今日出來幾精神。

家燕姐自言每次出外工作都不捨得孫仔，所以出門前會到住在隔壁的兒子家「撳鐘仔」，望一望孫仔先安心，回家就一定沖完涼先過去抱孫。得悉家燕姐和兒子住在隔壁，Patrick Sir相當羨慕，完全感受到她兒子和新抱多幸福，笑言這是有財力才可以實現呢！家燕姐不諱言要努力才能達成，但為確保自己和兒媳一家的私隱，無意把兩間屋打通。

經歷BB「斟茶」厚禮

Patrick Sir對湊BB已經稱得上是熟手爸爸，他說：「之前試過同埋狗仔一家四口出街，試過在外面幫囝囝換片，我一分鐘都換得到，亦『飲』過囝囝好多次『茶』。」家燕姐笑哈哈說：「孫仔都有試過『斟茶』畀我，我即刻退後，好勁㗎。」Patrick Sir笑稱：「同你敬茶，證明是孝順孫。」