拍靈異劇 C君收工要老婆接

《凶宅清潔師》洪永城首做監製 有壓力

香港文匯報訊（記者 梁靜儀）洪永城（Tony）與C君（鄭詩君）昨日以監製身份，聯同傅嘉莉、鄭俊弘及張達倫等，到將軍澳電視城出席新劇《凶宅清潔師》拜神儀式，首次為劇集做監製的Tony 坦言感到有點壓力：「因為好辛苦，同要處理好多事情，我做演員都唔係處理得咁好 ，好彩大家同C君佢哋互相扶持，公司有畀好多意見，就放心啲。」C君坦言害怕恐怖場面，凌晨時分要老婆接收工。

身兼監製及編審的C君指故事概念由Tony及另一位監製盧思麟度出來，他主要做編劇，形容今次是一個浩大工程，因本身怕睇恐怖場面，所以有時度完劇本收工也不敢駕駛。Tony笑指所以度劇本度到日落前便要收工。C君即說：「佢日落前收工，我要做到凌晨，要老婆落嚟接我，老婆一個人睇恐怖片都唔驚，所以佢係個指標，佢會代入觀眾身份去睇，話如果電視上睇就會驚，佢連我都唔驚啦，都冇咩嚇到佢。」問到拍攝期間可有遇上怪事？二人齊聲表示劇集拍了四分之三，好好彩沒有遇到，而昨晚就會去沙灘拍攝。

傅嘉莉戴近10個護身符

傅嘉莉（Kelly）昨日身穿白色低胸短裙現身，她表示之前買了很多靚衫，但因疫情未有機會穿着，今次擔正演出，便可有機會穿出來示人。她謂之前因父親患病入院，當時既要拍劇又要照顧家人，以致體重急跌10磅，幸好現時父親已出院在家休養中，她的體重亦上升了一點。

說到《凶》劇以靈異為題材，Kelly自言十多年前曾遇過靈異事件，很怕接觸這些，甚至連靈異電影都不想睇，但偏偏拍這套劇要睇好多靈異電影去參考，而洪永城知道她驚，便提供了平安符給他們。不過Kelly亦未安心，開工時身上戴了多個護身符：「之前我去睇師傅，畀咗好多護身符我，差唔多有10個，有玉器同葫蘆，因為我喺劇中成日着Sporty Bra，唔方便戴咁多，於是我就將啲符掛晒條腰入面。」她謂劇集經常要去荒廢的學校、拆卸的樓宇及軍營拍攝，地方又大霧又潮濕，她盡量忍住不去廁所，就算要去廁所換衫，她都不會關上門，每日返屋企入門前會用百解衣去抹身再跨火盆。

鄭俊弘比賽被打暈一暈

鄭俊弘（Fred）近月為參加無綫的《明星運動會》內的拳擊比賽而接受特訓，為了操弗身形更進行地獄式減肥，在兩星期內減去18磅，又為比賽打到周身瘀，太太何雁詩亦忍唔住在社交網出文暗示公司收買人命。

Fred表示傷勢已經好好多：「主要都係手同腹部比較傷，塊面就冇乜瘀，因為戴咗頭盔，不過比賽當日的確係被打到暈一暈。」他承認要兩星期減掉18磅是相當不健康，因為期間試過只吃蛋白及香蕉，返到屋企再加操，到最後更只喝水，及要浸熱水，直到過磅達標才多飲一點電解質飲料，由於當時還要拍《凶》劇，故愈拍便愈瘦，幸好現時體重已回升6、7磅。

問到太太是否為他出氣？Fred解釋太太只是心痛他被打得周身瘀傷，其實亦很支持他。問到以後可會繼續打拳？Fred說：「上擂台係好難得嘅機會，為夢想都想試吓，我會keep住打拳，但比賽試過就算。」