●姚焯菲唱《戀愛預告》大受歡迎。
●坤哥自爆見到姚焯菲就有種追星的感覺。
●李璧琦(左)是吳若希音樂上的恩師。

香港文匯報訊(記者 梁靜儀)吳若希、吳業坤、譚嘉儀、區瑞強、李璧琦、鄭融、黃妍及曾比特(Mike)等,前晚到將軍澳電視廣播城為《勁歌金曲》 錄影。

吳業坤(坤哥)當晚與環球歌手曾比特合唱偶像陳奕迅的歌《Shall we talk》,他表示很少有機會跟其他唱片公司的歌手合作,加上對方又是歌唱老師都有點緊張及壓力,但大家綵排時都不分年資交流,所以都很開心。

談到他近日在社交網站發文表示欣賞《聲夢傳奇》14歲參賽者姚焯菲(Chantel)在節目唱《戀愛預告》大受歡迎,更發文稱「生到個咁嘅女就好囉」,但被好友兼姚焯菲的導師JW(王灝兒)叫他放過Chantel。自稱是Chantel鐵粉的坤哥笑說:「我要一竹竿打一船人,相信全香港30歲以上嘅人都會對佢有初戀感覺,我同啲朋友話要搞個Fans club,但我唔會做會長,我真心覺得佢第一集好正,我指正係講佢唱歌,佢今次又唱到嗰種少女味道,我好欣賞佢,但冇非份之想,(JW叫你死心,唔好搞 Chantel?)黐線咩,人哋只得14歲,我只係以Uncle角度去遠觀,因佢仲係張白紙,唔想有啲乜嘢,只係想見到佢好我就好,所以我有留言話想第時有個女似佢咁sweet就好啦。」

問到坤哥會否自薦與《聲夢》合作?他即婉拒說:「唔好搞佢(指Chantel)。」跟Chantel相差17年的坤哥自爆見到Chantel就有種追星的感覺,之前在錄影廠曾碰見對方,但都不敢上前打招呼,這是從未試過的追星感覺。

吳若希最怕被伍樂城鬧

吳若希前晚於節目內獻唱新歌《只想你記得》,並要接受現場嘉賓批評,她說:「今次已經係第二次畀人評,其實就算第一次都唔緊張,不過上次因有我伯樂伍樂城喺現場,見到佢覺得好大壓力,因為當年自己新入行都係佢為我試音,佢好嚴肅同好惡,真心驚,成個錄音過程都係一段好長嘅經歷, (有冇畀佢鬧過? )當然有畀佢鬧過,上《勁歌》唔怕冇人撳Like,就係怕被佢鬧。」

當晚的演出嘉賓中,還有吳若希音樂上的恩師李璧琦,她說:「當年跟璧琦學唱歌都學咗年幾至出道,因為佢推薦我先有人生第一首歌,所以佢真係我嘅恩師,今次佢都會評我,都有少少緊張,怕自己表現唔好會令恩師丟架。」

另外,提到無綫高層杜之克將於9月離職, 吳若希大讚對方說:「雖然同佢唔算多接觸,但印象中佢係一個好nice嘅人,我曾經叫錯咗佢個名兩年,一直叫錯佢『Philip』,原來佢個英文名係Felix,但佢都照應我,直到拍攝《多功能老婆》,洪永城聽到我叫錯佢Philip,之後糾正我,我先知原來自己一直叫錯咗佢個名,真係樣衰到一個頂點,亦都睇得出佢個人非常大方,同埋好肯畀機會新人嘅管理層,所以對方離職會唔捨得,因為佢人太好。」