香港文匯報訊（記者 梁靜儀）泳兒、鄭欣宜、連詩雅、Gin Lee（李幸倪）、許靖韻、糖兄及Kerryta等，前晚到將軍澳電視城錄影《勁歌金曲》。泳兒透露近日當上《聲夢傳奇》導師壓力大，因頭暈及胃炎兩度入院，而欣宜上星期亦入院檢查及照腸鏡，醒後竟被綁在床上，原來她在醒與未醒之間竟逼人聽歌。
近日身體不適的泳兒，前晚受訪時談到身體狀況，她透露近日因頭暈及胃炎兩度入院：「有日起身突然好暈，行唔到直線，但冇諗住入院，因為嗰日公眾假期冇醫生睇，但最終都係入咗2次院，因為出咗院又再暈。」她指入院期間照了胃鏡及腸鏡，而事前要飲瀉藥，之後睡在床上郁動唔到，手腳出現麻痹，都擔心有事，所以又去照個腦，醫生指她有少少胃炎，但食藥後幫助不大，於是再去睇中醫，中醫指她身子虛弱。
她笑謂每當說想嘔，同事就會恭喜她，問到可有驗孕？她笑說：「又真係冇驗過，但安全嘅！（男友有諗過你有咗？）佢應該會擔心，不過係佢送我去醫院嘅。（未講得？）你哋諗多咗啦！」她估計因近日要拍《聲夢傳奇》甚少休息，有時忙於幫隊員揀歌連飯都吃不到，胃炎可能與做導師壓力大有關。
同場的欣宜，近日推出的新歌《@princejoyce》成為5台冠軍歌，她開心表示完全沒想過，可能大家都需要正能量，而自己每次聽這首歌都會腎上腺上升。欣宜又自爆早前不慎整爆盲腸炎手術的傷口，於是上星期便入院檢查及照腸鏡，醒後發現被綁在床上，她說：「原來我喺醒與未醒之間，逼醫護人員聽我首新歌《先哭為敬》，真係好黐線，我最緊張當時有冇爆粗。」
她又稱平時也有發開口夢，加上身體肥胖，擔心會有睡眠窒息症，所以瞓覺時會用手機app監察自己睡眠狀態：「除咗錄低我啲鼻鼾聲，又聽到自己好狡猾咁講：『大家都有着數嘛』，有次又發現有把好姣嘅聲講：『你知你想要咩』，（是否在發春夢？）當時真係春天。」
連詩雅願跟黃嘉雯合作
連詩雅早前返內地拍劇3個月，她謂30年來還是首次離開屋企這麼長時間。被問到最掛念誰？她笑說：「掛住大家，媽咪同埋屋企隻狗。」她謂回港後最擔心愛犬唔認得自己，雖然她走時狗狗都有坐住她的行李箱好唔捨得，其間又跟牠視像，但都怕踏入家門口時會吠她。
連詩雅與陳家樂拍拖已是公開的秘密，但早前卻傳出前港姐冠軍黃嘉雯介入二人的感情，問到連詩雅可認識黃嘉雯？她說：「我知佢係邊個，但唔認識，對方選港姐時，我都有揀佢做冠軍，希望遲啲有機會合作。」
說到陳家樂日前出席公開活動時，雖然避談感情事，但就帶笑聲稱感情穩定，生活愉快。連詩雅笑說：「我都生活愉快。」不過對於感情事，她就跟男友口徑一致，不欲多提，又表示希望專注工作。當問到她離港期間可有跟陳家樂視像通話？她就說：「我同好多人視像通話，（黃）翠如同YoYo（陳自瑤），佢哋好重要，大家覺得重要嘅520，自己都唔記得咗，（記得返之後，有冇表示？）唔講啦！」
0
已點過讚
0 / 255