香港文匯報訊（記者 李思穎）UA戲院昨日全線結業，任達華表示：「消息來得突然，很不開心，對電影業是很大打擊。況且UA是戲院龍頭，希望獲得大集團收購。既然事情已經發生，必需要面對現實，只希望疫情快些過去，各行各業回復正常，相信夏天雨季後，把所有霉氣清洗乾淨，大家再重新出發。」

任賢齊說：「大家努力拍好些電影，令市場轉好便會開多些戲院，不過聽到UA全線結業消息都好突然，我以前經常去UA睇戲，疫情影響好大，好多食肆亦關門，好心痛！」

洪金寶叫回到聽收音機年代

影圈大哥大洪金寶主動提到UA院線結業，他慨嘆說：「遲些無發行公司，電影、電視都無得睇，要回返麗的呼聲年代，要聽收音機，香港慢慢復古，（感覺唏噓？）當然啦，以前每個星期六日都去戲院霸位，睇觀眾反應，又會睇我老死麥嘉演的電影，家冇呢支歌仔唱，所以好佩服同欣賞香港電影公司在疫情下仍製作及開戲，自己就無呢個本事，若然是同業開戲，要我減片酬都有商量。」

吳卓羲感嘆道：「UA戲院可算是陪着我長大，去得最多是沙田UA，聽到全線結業好可惜，今次疫情對各行業影響好大，希望疫情快些過，之後開返多啲戲院。」譚耀文說：「對於UA院線全線結業感到惋惜，自己去得最多是金鐘UA，也有同女朋友去拍拖睇戲，希望日後可以用另一種投資方式，或者給其他院線接手。」

林曉峰就有新提議：「隨着時代改變，可以在戲院入面播放演唱會現場實況，始終受疫情影響，好多場館都受人數所限，反而可以在戲院配合歌手表演同步直播，此舉可以令戲院增加收入和幫助其繼續生存 。」