「黃記者」劈腿失婚　「黃絲」拉隊贈慶

（香港文匯報記者 雨航）究竟要衰到咩程度先會令「黃絲」盲粉都冷嘲熱諷？「高登新聞台」前「記者」崔銳蛋就係好例子嘞。話說崔銳蛋去年初離開「高登新聞台」後自立門戶，整咗個叫「蛋蛋俱樂部」嘅「新聞媒體」，靠住賣慘同鬧警察呃到唔少「黃絲」課金，仲疑似背住老婆一腳踏幾船。崔銳蛋近日喺fb發咗篇離婚聲明，同時網傳係崔銳蛋二奶嘅「記者」「×兔仔」亦拉隊離開「蛋蛋俱樂部」。如果其他「黃圈」人物發生啲咁嘅事，點都會有「黃絲」盲撐，唯獨今次大家食到一地花生，睇嚟崔銳蛋真係得罪咗好多人喎。

曾拖街數被貼大頭「通緝」

崔銳蛋嘅劣跡真係多到數唔晒。網民「呃錢崔銳蛋」就回帶，稱崔銳蛋原名叫梁×恆（Louis Leung），仲力數佢早喺2016年嗰陣，已經用「本土民主前線」嘅名義四圍借錢唔還，搞到俾人貼大頭相街招追數。後來，崔銳蛋做「高登新聞台」「記者」，因為2019年喺理工大學暴動現場「報道」而被捕。雖然「高登新聞台」當時稱已派出律師跟進，但崔銳蛋竟然自己直播籌保釋金，最後啲錢用咗喺邊就心照啦。

崔銳蛋離開「高登新聞台」後就開咗個「蛋蛋俱樂部」嘅fb專頁，一邊直播新聞一邊「賣黃」，仲以「記者」被襲為由叫人課金落佢私人戶口，但條數係點睇嚟都冇乜人知。

fb專頁「黑喵與白兔」近日發文，話：「本人×兔仔、喵喵怪、米奇已離開『蛋蛋俱樂部』，貴台一切事務再與我們三人無關，特此聲明。」仲hashtag「咪話我地（哋）反骨個台我哋有分砌出黎（嚟）」「點解三個一齊走你自己諗下（吓）啦」「仁至義盡啦拜拜」。唔知係咪畀緊說話崔銳蛋聽呢？

疑似二奶出聲明割席

崔銳蛋其後亦喺fb發聲明話：「本人和前妻已辦理離婚手續，離婚一事不涉及任何人，不要胡亂猜測。」對崔銳蛋同時面對離婚同「員工」拉大隊走人，大批網民都踩多兩腳。「Wei Wah Jackling」就話：「哈哈……真係恭喜佢……又可以扮可憐呃課金去賭球飲酒囖（囉）！」「Kit Wan」就問：「蛋哥幾時還錢？」「高星」就猜測：「原來兔兔知道蛋蛋拎課金黎（嚟）食毒品，還要兔兔養蛋蛋過活，所以離開蛋蛋。」

急色「Lunch仔」落井下石

早前被爆性騷擾「女手足」、一直渴求戀愛嘅「Lunch仔」李國永唔知係咪「眼紅」崔銳蛋一腳踏幾船，所以喺fb轉發咗崔銳蛋篇離婚聲明仲講咗句：「恭喜曬（晒）！」「Ho Lam Chan」亦話：「呢啲人唔抵可憐，睇佢幾時人財兩失，到時我樂意講多幾句恭喜曬（晒）！」

雖然網民普遍覺得崔銳蛋抵死，但就認為「Lunch仔」冇資格話人。「You He」就搬出「黃絲金句」：「收×啦搞分化！」「Ranger Ching」亦質問：「嘩（譁）眾取寵完未？」