（大公報記者 鄭晴）去星級酒店鬼祟「開房」，變成「港獨」分子新常態！無幾耐之前，前香港眾志秘書長黃之鋒先至被人捉到正；呢一期，就輪到上月底「出冊」嘅前香港民族陣綫發言人梁頌恆。

有人向鄭晴報料，話前晚見到面臨破產嘅梁頌恆，居然現身九龍站五星級W酒店。

當時，一個神秘西裝男企喺酒店入口恭恭敬敬等候，等咗一陣，身穿白色短袖Tee和深色短褲嘅梁頌恆同埋另一個男子嚟到，三個人會合之後四圍張望，似乎好驚被人見到咁。之後，手持房卡嘅西裝男帶領梁頌恆入咗升降機上樓。報料人續說，當晚梁頌恆一夥有成20幾人聚會，當中包括涉觸犯香港國安法被捕嘅前學民思潮成員李宗澤；報料人仲聽到呢班人話「有嘢傾」。

W酒店一晚五千蚊

梁頌恆一直拖欠立法會93萬，立法會行管會已向高等法院申請，要求法庭向佢頒布破產令，聆訊在12月2日開始。啱啱出獄、無嘢做兼面臨破產嘅梁頌恆，居然可以去城中數一數二嘅高檔酒店風流快活，仲有「手下」招呼帶路，真係要套用張竹君醫生嘅名句：「生活多姿多彩」。

鄭晴上網查一查，W酒店的海景非凡套房，租一晚要成五千幾蚊，梁頌恆點解玩得起？實在令人懷疑。

講開又講，梁頌恆近日在facebook發帖，口口聲聲話關註12逃犯，仲慫慂人撐泰國示威，但原來佢掛住嘆世界，佢班「手足」睇清未？