大公文匯全媒體報道：一年前開始喺網上賣頭盔、「豬嘴」等「抗爭」裝備嘅網店「HK Protect香港保護」，開業個多月就話啲貨俾海關充公而一鋪清袋，至近日終於蒲頭，點知一嚟就話執笠，仲叫大家幫幫手清埋佢啲倉底貨。fb專頁「學民苦主大聯盟」噚日就話接獲讀者回報，大鬧呢間「黃店」去年用海關充公貨物為由呃錢唔退錢，事關到執笠都冇提過回水：「賺夠了，bye bye『黃絲』。所以話『黃色經濟圈』真係搵快錢嘅好地方」、「唔知負責人有咩想講下（吓）呢？定係諗住用不分化不割蓆（席）做擋箭牌，拒絕回應呢？」

「HK Protect香港保護」日前打咗篇千字文回顧種種經營困難，最後就話呢場「運動」已轉咗風向，所以佢哋希望呢個「旅程」告一段落，仲話佢哋仲有30萬元「蟹貨」未賣出，而家特價發售，只求回本喎。