●梁振輝 香港資深出版人
以下是一段以廣東話書寫的文字，當中筆者刻意夾雜了多個與「篤」字相關的粵語詞彙（大部分於上幾期提及），用以考核AI在現有技術基礎上的普通話翻譯表現：
尋晚班舊同學，約我去隔籬街抆篤間波樓篤波。其實我應承咗老母斬手指戒賭，見佢哋咁有誠意嚟到我屋企附近，就脆脆地陪下佢哋喇。篤咗三粒鐘我就贏到開晒巷，如果唔係有人篤手指，我點只執皮幾嘢；不過呢個老同學信得過嘅！
返到屋企同細佬講返呢單嘢，佢話我篤數；我就話班友波屎，仲夠膽同我賭，多多都唔夠輸喇！之後我同佢講，老母份人好火爆，所以千祈唔好篤爆我，唔係佢實響屋企查撐篤撐啫！講完我就濕咗三千銀過佢當揞口費嘞！
今朝返工前肚谷谷，就入廁所諗住放低幾両，點知踎咗一個骨，屎就屙唔到篤，淨係屙咗篤尿。
落到街，行咗幾步，聽到時時聲，抬頭一望，原來有個蜜蜂竇喺棵樹上面，我見地下有支樹枝，就揦起想篤上去；有個伯父路過，即刻喝住我；我唔明，問佢佢就擰擰頭，我個人求知慾好強，梗係打爛砂盆問到篤喇；卒之佢叫我唔好玩啲咁嘢，話啲蜜蜂針我我抵死，但係我咁做會累街坊；就係咁，我逃過一劫，仲普渡眾生𠻹！
返到公司樓下，有個同事衝埋嚟同我講，坐近廁所嗰條新仔，琴日響老細面前篤灰，話我一日有成十幾次走去廁所吞pop，叫我有心理準備。哈，條友佢一嚟到我就睇佢篤眼篤鼻，不過我同佢無怨無仇；估唔到佢玩篤背脊，博上位都唔使用呢啲陰招㗎！
上到去，老細真係搵我入去詢；我話呢排腸胃不適，所以先至頻頻去廁所啫；我有問係咪有啲閒人篤我出嚟，佢就話若要人不知，除非己莫為，冇人篤都要自律，真係冇晒癮！
放咗工，心情都未平復，於是搵班友打牌。講定打16圈。我喺頭15圈大殺三方，咪諗住今日有唔少落袋囉！點知喺最後一圈佢三家輪住嚟發威，咁咪畀佢哋夾手夾腳打穿咗個葫篤，真係唔抵！
以下是筆者所提供的主要廣普轉換：
1. 去隔籬街抆篤間波樓篤波——「往隔壁 街尾的枱球室打球」
2. 斬手指戒賭——指如再賭便砍/剁去指 頭，以「砍/剁去指頭戒賭」表示戒賭的 決心
3. 脆脆地——本指乾脆地，這裏指「勉為 其難地應酬一下」
4. 贏到開晒巷——「大勝」
5. 篤手指——用食指「篤」在賭枱上以確認 「先賭後付」的承諾，通常還款有寬限期
（「篤手指」也指糖尿病患者利用採血針 刺手指後取一滴血來讀取血糖值）
6. 執皮幾嘢——一皮嘢是一萬元的俗稱， 執皮幾嘢就是「贏一萬多塊錢」
7. 篤數——報大數，「虛報贏錢數目」
8. 波屎——棋屎指棋藝差；波屎指「球技 差」
9. 篤爆——「揭穿/告發」
10. 查撐篤撐——用來形容粵劇或大戲的一些 大場面。此詞也可用來形容一些激烈的場 面，故可譯作「大吵大鬧/大發雷霆」
11. 濕咗——濕與水有關，水為財，濕咗借 指「給了（某人一些錢） 」
12. 揞口費——「封口費/掩口費」
13. 肚谷谷——「肚子脹脹的」，有需要上廁
14. 放低幾両——「撒幾根大便」，方便一下
15. 屙篤屎/篤尿——「撒一泡屎/一泡尿」
16. 踎咗一個骨——一個骨指一個quarter， 即四分一個小時；踎，蹲的意思，指如 廁。踎咗一個骨可譯成「蹲了一段時 間」，或準確地譯成「蹲了15分鐘」
17. 篤上去——「捅上去」
18. 打爛砂盆問到篤——「打破砂鍋問到底」
19. 累街坊——「連累無辜的人」
20. 篤（人）/篤灰/篤背脊——「打小報告/ 告發」
21. 篤我出嚟——「把我供出來」
22. 詢——「問話」
23. 吞pop——「躲懶/開小差」
24. 篤眼篤鼻——「不順眼」
25. 冇晒癮——「不是味兒」
26. 大殺三方——「大殺三方/一家勝三家」
27. 夾手夾腳——「聯手」
28. 打穿咗個葫篤——「打穿了錢包底」，喻 好大部分已到手的利益在最後關頭被奪走
是次筆者對6家中外AI進行考核，各家的廣普翻譯基本功均算稱職。從生成的輸出，筆者看出有4家AI「關門打仔」——從自家語料庫查找，沒有的就直接推敲，不假外求；另外2家AI「廣交英豪」——自家語料庫沒有的就訴諸「爬蟲」。結果，前者的翻譯效果不盡如人意，後者則憑藉其「爬蟲」技巧取得較佳的表現。如此看來，「爬蟲」決定了輸出質量；唯一的「死門」就在資料不多/不明顯地出現或不存在於網絡上時，如：抆篤；脆脆地；篤手指；執皮幾嘢；查撐篤撐；放低幾兩；踎咗一個骨；吞pop；打穿咗個葫篤等。
0 / 255