梁振輝 香港資深出版人

2013年，「講呢啲」呢個潮語喺坊間開始流行，年輕一代大都以為呢個出自資深藝員劉江口中嘅口頭禪係編劇嘅神來之筆，其實廣東話一直有咁用。唔講可能唔知，「講呢啲」喺唔同處境會表示唔同嘅意思。

「講呢啲」原本係「講呢啲嘢」嘅縮寫；一般嚟講，意思係「說這些（東西）」。

示例1：

母：阿仔，你已經讀書唔成，出嚟做嘢做幾日就劈炮，喺屋企唔係死瞓爛瞓就打機打天光！

子：阿媽，你成日都係「講呢啲」，可唔可以講下我啲好嘢㗎？

母：唔係「講呢啲」，仲有咩好講呀？

「講呢啲」有時仲包括咗表示「唔使客氣」/「應分做嘅嘢唔使多謝」嘅語意。

示例2：

A：嗰鑊嘢唔係多得你，我今日都企唔到響呢度；你嘅大恩大德，第世都報唔晒！

B：一場兄弟，「講呢啲」！/使唔使「講呢啲」呀？

「講呢啲」有時仲包括咗表示欣賞對方嘅讚賞，但係唔使過分吹噓。

示例3：

A：你成五十幾歲人，啲皮膚滑到好似剝殼雞蛋咁，話你廿幾歲都有人信！

B：好衰㗎，「講呢啲」！

「講呢啲」有時仲包括咗表示好唔滿意對方提起自己嘅瘀嘢。

示例4：

George：大家仲記唔記得30年前Leo有日響學校門口踩狗屎嗰單嘢呀?

Leo：George，你冇嘢呀嘛，幾十年後仲「講呢啲」！

「講呢啲」有時仲包括回應人講埋晒啲近乎廢話嘅無聊嘢。

示例5：

A：我老豆高過你老豆，我老母高過你老母，唔怪之得我高過你全家喇！

B：幾十歲人，「講呢啲」！

「止咳」就係做啲嘢，令到咳嗽停止。最簡單就係走去買支川貝枇杷露、買樽川貝枇杷膏，又或者沖返碗陳皮水；通常咁做只能夠舒緩，而未必可以斷尾，咁即係話「止下咳」啫！

「頂癮」個癮其實係指鴉片煙癮。上咗癮就即係有咗食鴉片煙嘅癖好；到時到候冇得食就會周身唔自然，仲眼水鼻涕都流埋。講返而家，好多人戒煙嗰陣都會用電子煙嚟「頂癮」；作用咪係暫時搵佢頂住個癮頭，咁即係話「頂下癮」啫！不過煙癮就係話戒咗，但係就上咗電子煙癮。廣東人會用「止咳」、「頂癮」嚟指用某種形式或者方法去暫時滿足一下某啲嗜好或者欲望。唔少人話睇周星馳啲片都覺得好「頂癮」，呢度個「頂癮」指「頂過癮」，非常之過癮咁解。