梁振輝 香港資深出版人
有香港月餅商賣月餅嗰陣曾經用上「行船爭解纜，月餅我賣先」呢個廣告術語；姑勿論呢個商業行為嘅成效係點，當年確實成為城中熱話。好多人都以為呢句嘢係由有關方面創作嘅；可以咁講，呢個講法啱咗一半。原來廣東人有話：「行船爭解纜，買賣佔前頭。」大家唔同嘅地方就係喺後半句。究竟呢個民間智慧係點樣得嚟㗎呢？
根據筆者嘅考究，句中嘅船係指漁船，所以呢句嘢應該係船家從捕魚經驗所得。點解「行船爭解纜」？一解咗就可以開船，眾船家基本上可以掌握到邊處海域至多魚撈，所以早啲抵達目的地就可以佔據捕魚有利位置；同埋可以早啲歸航，咁就可以早啲出貨，賣嘅價錢當然又會好啲，呢啲咪叫「買賣佔前頭」囉！就係咁，呢句嘢變成咗船家嘅金科玉律；對其他行動嚟講，呢句嘢就係話邊個先行動，邊個就佔據主動位置，有捷足先登嘅意味。咁睇，攞「行船爭解纜，月餅我賣先」呢句嘢，嚟做「賣月餅」嘅策略咪掂硬！常言道，世事無絕對，可能以下呢幾句啱聽啲：
行船爭解纜，行看似掂；
遇對手強橫 未許佔前頭。
綽號「閃電俠」嘅牙買加「飛人」保特，響2009年世界田徑錦標賽男子200米，做出世界紀錄19秒19。呢個被視為當代最偉大嘅田徑短跑選手，過終點嗰陣，大幅拋離其他對手；贏到「開巷」，贏到「開晒巷」！
「開巷」、「開晒巷」，「開」咗邊條「巷」呀？唔通係「磅巷」？定係「保勒巷」呀？翻查歷史，清末民初，廣州市民喺多番內訌同埋起義嘅事件上經歷咗好多次激烈嘅「巷戰」。可能係咁，有廣州人就攞咗「展開巷戰」中「開巷」兩個字嚟形容一啲打鬥激烈嘅場面，例如：打到「開巷」、砌到「開巷」。上世紀七十年代初，可能因為有人「派片」、有人「收片」，「阻街」執行得相當寬鬆，有好多小型食肆或者街檔喺「旺場」嗰陣，就響接近行人路，甚至附近嘅巷仔開枱做生意；港九新界通度都係咁，場面相當誇張。唔知係咪因為將啲枱「開」到街頭「巷」尾，所以有人用「開巷」嚟形容勢頭好勁或者聲勢浩大、不可阻擋嘅狀態。為咗加強語氣，有時「開巷」會講成「開晒巷」嘅。最普遍嘅情況有：
爆到「開巷」，即係爆棚。
贏到「開巷」，即係大比數勝出或者勝負雙方喺成績上有好大差距。
賺到「開晒巷」，即係豬籠入水、盆滿缽滿。
嘈到「開晒巷」，即係係人都知有人拗得好激烈。
某門生意如果「開到成行成市」，就表示該門生意當時非常興旺，絕對包含咗景象一片旺盛或者勢頭好勁嘅意思。近年「台灣珍珠奶茶」，喺香港五步一樓、十步一閣，就係一個好例子。呢種生態簡單啲講就係「開行」；講下講下，就講咗做「開巷」。 原來「開巷」呢個詞係同「巷」一啲關係都冇！
香港呢三幾十年，尤其97之後，因為有「港澳個人遊」，每年一到中秋，各大月餅銷售商嘅兩地月餅廣告賣到「開晒巷」。唔怪之得，一個有名有姓嘅雙黃蓮蓉月，閒閒地都要你成五六十蚊；真係唔知食咗幾多廣告費落肚嘞！
0 / 255