《蘋果日報》結業前出咗兩本叫《不是最終章》及《廣告信念》嘅特刊，當時聲稱「好搶手」「排隊都買唔到」。𠵱家距離佢哋結業接近兩個月，有黃媒訪問踢爆有「黃店」仲有幾千本存貨未賣完，遲啲就會棄置晒喎。有網民就話呢個訪問內容擺明都係搵下家接貨啫。
有黃媒日前報道話黃店「蟹貨倉」6月底接收超過兩萬本《不是最終章》及《廣告信念》特刊，但依然未賣晒，仲剩低約1,000本《不是最終章》同埋3,000本《廣告信念》。佢哋話如果遲啲仲未賣晒，「所有刊物都會被棄置。」蟹貨倉老闆仲聲稱「不希望浪費每一本僅餘的《蘋果日報》刊物」「實體書可留記憶」喎。
網民譏「攞去廢紙回收」
心水清嘅網民一睇就知，又係黃店叫「手足」幫手埋單啫。網民「Alex Cheung」直接話：「各路手足，眾籌時間又到啦。」「梁祝」就直言：「又想搵水魚撈一筆。」「Mobb Chan」就「提點」店主：「既然為意義吾（唔）系（係）為錢，與其dispose（棄置），可（何）不免費派發？」「Lala Mo」就表示不解：「真心唔明！二百萬零一人喎！咁都賣唔曬（晒）？」「Jason Chan」就揶揄：「環保D（啲），攞去廢紙回收，唔好浪費！」「Chow Tsz Yeung」就建議不如佢哋買斷先，咁就唔使回書囉。
有網民揶揄，所謂買《蘋果日報》只不過係有啲人鍾意跟風。網民「Chun Man Tam」直言：「熱潮都過左（咗），打完卡冇人俾（畀）like了。」其實都明嘅，當初想入多啲貨藉機賺多筆，但既然睇漏眼，咪自己食咗佢囉，做乜仲要啲「手足」去埋單呢？ ●香港文匯報記者 藍松山
0 / 800