喺修例風波期間猛畫煽暴漫畫、親「熱狗」嘅香港漫畫家「怪叔叔」盧熾剛（Cuson Lo），近日接到商家廣告，幫手宣傳韓國企業LG研發嘅「穿戴式空氣清新機」，講到戴咗之後可以過濾一堆細菌云云。其實呢，「熱狗」喺疫情期間一直聲稱戴口罩以至政府其他防疫措施都係「政府用來限制港人自由嘅陰謀」，同樣係親「熱狗」嘅「手作達人」吳斯翹「Billie Ng」就企出嚟揶揄個口罩「勁似狗口罩」，唔少網民亦質疑「怪叔叔」為咗收廣告錢而誤導市民。
被指似狗口罩 「可以滅聲」
「怪叔叔」近日畫咗頁漫畫宣傳所謂「穿戴式空氣清新機」，話𠵱家好多人戴口罩出街，置身人多擠迫嘅車廂就會好侷促，但戴咗呢部機後就「令呼吸變得暢順」，更聲稱配合濾網就「可以過濾達99%嘅病毒同細菌，包括大腸桿菌、綠膿桿菌、克雷伯氏肺炎菌、表皮葡萄球菌及金黃葡萄球菌」云云。
就咁睇啲功能都幾犀利，但吳斯翹就覺得宣傳呢啲，有違「熱狗」嘅「教義」，即喺fb發帖揶揄：「好恐怖，一千蚊個口罩。勁似狗口罩，可以滅聲」、「仲要買唔到filter，唔知防到乜」。
唔知係咪有組織搞批鬥呢，好多網民留言質疑「怪叔叔」。「Toby Chan」話：「佢官方商品描述都冇講明話可以預防今次肺炎病毒，其實係咪只係普通空氣清新機，只係可以帶出街咋，當口罩用好似好危險喎？」「Step Hen Hung」亦質疑：「過（濾）唔到新冠病毒有乜用？」
用家彈唔實用批亂接job
有啲網民就講到自己已經買咗咁，留言大彈呢部機嘅缺點多多。「Helena Tang」話：「我都買左（咗）俾（畀）我老公，老實講戴上去真係重，唔配埋條頭帶用會dur（墮）落嚟，同埋戴完成日聽唔到佢講咩。」「Gary Ng」就話唔實用：「電量細，最低速都用唔到8個鐘，就算用到8個鐘都唔適合開工用。最高速1個鐘左右，只適合做運動？」
「Molly Wong」亦覺得唔抵：「嚿嘢都千幾蚊，裝嚿嘢個UV殺菌盒又千幾蚊，成套差唔多$2,500。」「Samson Chan」就話：「叔叔，早前好多用家投訴買唔到濾網，用家打電話去，（商家）都唔理人。」「Gloria Katze Lee」就批評「怪叔叔」：「身為專業人士，點窮點×街都好，都唔可以亂接job。」
呢個反面教材教曉大家：搵「黃人」賣廣告，隨時適得其反，甚至無端惹火燒身！ ●香港文匯報記者 雨航
0 / 255