香港文匯報訊（記者 阿祖） 《無毒一生，燦爛人生2025》全港青少年造型設計比賽，日前圓滿舉行，大會邀請Kellyjackie擔任「禁毒大使」，兩位「愛心大使」曹敏寶（Mable）及邱芷微（賈名媛）亦有現身支持。

Kellyjackie現場演唱《他約我去迪士尼》及禁毒歌曲《不可一不可再》。她坦言已連續16年擔任「禁毒大使」，心情確實帶點矛盾：「雖然我有首禁毒歌《不可一不可再》，但成日都希望有朝一日唔需要再唱呢首禁毒歌，因為社會唔再需要禁毒，大家已經遠離毒品。」但她認為現在太多科技，年輕人接觸毒品的渠道更隱蔽，所以人與人之間需多些關心。年前曾患抑鬱症的Kellyjackie，更加明白身心靈健康的重要性：「自己係過來人，一句鼓勵說話可能會幫助好大，嗰份暖意可能會令人醒一醒，當然係需要尋求專業人士協助，但適切的關心都同樣重要，所以我建立咗個YouTube Channel 『Twinkie Star Whispers星語夢之聲』，希望大家好簡單咁聽吓歌，好似同小朋友傾偈一樣。」

Mable全家前來支持，作為分別6歲的囝囝和3歲囡囡的Mable，對青少年吸毒年齡下降，感到相當擔心：「作為家長真係好驚，我有個姪女都係得十二三歲，佢話都見到有好多朋友吸太空油毒品，首先唔知佢哋點解會買到，最擔心係佢哋太細個，根本未必明白禍害，家長需主動關心，提供情緒抒發窗口。」她以愛教育子女，對子女因材施教，向孩子解釋亂吃藥物會影響健康，所以有任何人叫佢哋食啲唔熟識嘅嘢，就要話畀媽咪聽，讓佢哋先有個安全意識。她表示，「我個仔開始懂事，佢又好貪靚，又鍾意做Super Hero，我就會話畀佢聽亂食嘢會做唔到Super Hero，飛唔到上天佢就會好驚。」

邱芷微分享英國留學時見聞，指室友常吸食大麻，氣味難聞，更目睹有人因服食軟性毒品後神志不清。她透露曾被引誘過食軟性毒品，慶幸自己膽小最終沒嘗試，並以同學的狼狽模樣為戒，呼籲年輕人遠離毒品。