入黑暴Group約異性黐身黐勢 網民：女唔貪錢點會上釣﹖

黃圈真係亂，唔止騙財，仲要騙埋色。有網民近日喺「連登」踢爆一個叫「Terry Lau」嘅30歲男文員，喺修例風波期間加入黑暴嘅文宣Group不斷炫富，然後約啲女「手足」出嚟黐身黐勢。有人仲回帶原來「Terry Lau」幾年前已經喺網上扮晒身患絕症，博啲女仔同情然後財色兼呃。有網民就話，好多嘢一隻手掌拍唔響，啲女「手足」唔貪錢又點會上釣呢？●香港文匯報記者 雨航

網民「phenelzine」近日喺「連登」開post，詳細起底呢個黃絲騙子嘅資料，原來呢個「Terry Lau」早喺幾年前已經喺網上開post話自己身患絕症，有當年俾佢呃過嘅女網民就話，自己當時誤信「Terry Lau」患咗個全身24小時都痛到好似俾火燒咁嘅怪病，於是好心傾電話安撫對方，點知「Terry Lau」不斷同佢講性事，仲要求佢上門探病，自己一拒絕就俾對方鬧返轉頭，「條友成日都扮有重病呃女仔……原來而（𠵱）家仲未死。」

稱患「玻璃骨」呃錢 問網友係咪處女

「phenelzine」其後補充，話「Terry Lau」當年講到自己患上「玻璃骨」，呃咗唔少網友嘅錢同慰藉，但每次同女網友傾電話都會問人係咪處女。

佢又貼出多張疑似「Terry Lau」溝女「手足」嘅WhatsApp對話截圖，從中可見呢個「Terry Lau」嘅用詞非常露骨，包括「我扯左（咗）旗，好粗、粗」「我兩個ex（前度女友），都話滿足，同話我長、粗」等等。

話打扮值10幾萬 被踢爆淘寶貨

要呃到女「手足」當然要靠衣裝，可惜「Terry Lau」真係錯漏百出。「phenelzine」貼出多張「Terry Lau」喺instagram炫富嘅截圖，見到「Terry Lau」喺其中一張截圖講到自己成身打扮值10幾萬蚊，點知俾網民踢爆其實都係淘寶貨。更好笑嘅係，「Terry Lau」竟然貼出一張補鞋嘅相，紛紛對「Terry Lau」呢個着緊價值10幾萬蚊衫褲嘅人補鞋嘅行為搲晒頭，更有眼利嘅網民即刻睇到地下嘅階磚係公共屋邨獨有。

「phenelzine」最後仲向「Terry Lau」提出多項質問：幾年前聲稱有絕症但又成日同女仔講淫嘢嘅事係咪想騙財騙色？點解會忽然富貴，由叫人捐錢醫病到上網炫富？幾年來不斷向女網友發私訊，會唔會覺得自己行為構成侵犯？「運動」期間入文宣Group約女「手足」出黎黐身黐勢，可唔可以解釋吓？

唔少「連登仔」都話對「Terry Lau」好有印象，紛紛揶揄「好掛住佢」。「MikiMiki」就好無奈：「點解有啲咁樣呃女仔既（嘅）人渣。」「冇波就搵蘿」就覺得啲俾人呃嘅女「手足」唔抵可憐：「不過佢（Terry Lau）d（啲）ig post成日post女仔肯同佢食嘢，d（啲）女仔都唔好得去邊，貪條友帶佢地（哋）食米芝蓮又post LV（Louis Vuitton）先肯應承佢出黎（嚟）姐（啫），最後咪又係因為包包（手袋）比（俾）呢條×樣×，好×嘔心。」

「Terry Lau」嘅手段咁低莊，其實就好難有人會中計嘅，但現實嘅嘢真係好難講，特別係經常將網上假新聞假消息信到十足，俾黃店呃完一次又一次仲要繼續獻金嘅黃絲。