「黃店」做生意唔老實已經唔係第一日嘅事，但班黃絲每次俾人呃完又要嘈，嘈完之後又繼續俾人呃，一次又一次咁上當，正常人真係好難理解到佢哋個腦袋係點樣運作。好似近日又再有「黃店」俾人踢爆淘寶貨扮韓國貨，仲以幾倍嘅價錢賣畀班黃絲，搞到成班黃絲苦主圍爐大叫慘慘。

僅價錢唔同 似到十足十

「東尼大碌木」早前就喺連登討論區出post，直指「黃店」「skymart」員工賣淘寶貨呃無知妹豬錢。佢就話自己本身見到「skymart」啲衫幾靚，所以私訊咗「skymart」嘅PR Alexiar，但就得唔到回覆， 由於見到咁多人都follow佢，所以一心覺得唔會俾人呃，點知轉個頭就有朋友同佢講返，原來「skymart」啲貨全部都係淘寶嘢，仲要賣貴勁多。「東尼大碌木」仲將「skymart」嘅貨同淘寶貨作比較，發現兩者除咗價錢唔同之外，其餘又真係似到十足十喎。

唔少黃絲知道自己中咗伏後，個個都好後悔。「堂堂正正風風光光」話：「我就係其中一個苦主，洗（使）成千幾蚊諗住買韓國貨，點知最後買咗堆淘寶貨。推到其他妹見到，希望佢哋唔好好似我咁蠢。」「米露米露」就嬲到爆晒粗咁講：「洗（使）×咗幾百蚊買淘寶衫真係on××。」

網民懷疑想借妹妹仔助洗黑錢

除咗發現「skymart」用淘寶貨扮韓國貨之外，有網民仲懷疑呢間「黃店」疑似想借班妹妹仔幫佢洗黑錢，「蕃茄牛肉烏冬」就引述有個「妹豬」爆料話：「係（喺）live見佢（「skymart」嘅PR Alexiar）話有份係（喺）屋企就有糧出嘅工，於是出於好奇心就DM（direct message）左（咗）佢，份『工』嘅內容主要係幫一間大公司將一筆錢轉走俾（畀）人，過程中係唔會用到自己嘅錢，而報酬就係個筆錢嘅一半，小則1M（即1百萬），多則20M（即2千萬）。」「蕃茄牛肉烏冬」就繼續話：「聽到呢到（度）已經唔多對路，如果賺錢係咁簡單，啲人仲洗（使）番（返）工嘅？然後我上網search有關呢類嘅工，俾我搵到有個騙案叫『資產轉移』，而『資產轉移』騙案同佢份工嘅簡介好類似，令人感覺好可疑。」

今時今日嘅「黃店」呃「同路人」嘅手段真係花式翻新，但相信班淨係識得分顏色嘅「蠢黃」都依然會懶理事實，繼續盲撐俾人呃落去。 ●香港文匯報記者 倪思言