稱尖咀店告急圖催谷生意 「人血張」疑故伎重施惹劣評

「黃色經濟圈」頭號醜聞纏身嘅黃店龍門冰室日前出post，繼宣布銅鑼灣分店捱唔住後，再聲稱尖沙咀分店有機會喺4月1號執埋。見過鬼仲唔怕黑？簡單一條可能執笠嘅消息又引來黃圈嘅強烈質疑，唔少人懷疑龍門老闆張俊傑係咪藉愚人節同大家玩嘢呃生意。為咗證明自己嘅清白，張生不如趁住今次機會宣布全線結業，唔好等啲黃絲成日以為你呃佢哋錢喇。●香港文匯報記者 倪思言

話說人血龍門老細張俊傑日前就喺fb出post，話自己一直「清者自清」，但生意因為「謠言」影響而每況愈下，仲賣慘「我承認我係喺運動中最失敗的生意人，直至宜（）家不但冇車冇樓銀行冇錢，甚至連一班伙記（夥計）生計都可能維持唔到。」最後，佢仲懶煽情咁話自己永遠會記得同班黃絲行過呢一段路，希望黃絲們會記得「龍門」改好咗嘅味道。

預告愚人節摺埋 網民質疑吹水

但張生呢啲招數實在用得太多，好多黃絲都免疫咗。網民「迷上拿卡的本領」就質疑：「點解7日後先執笠，傑哥咁早就要出嚟講？計返條數，7日後正正係4月1號（愚人節），根本係張俊傑哥趁愚人節同大家開個玩笑姐（啫），大家千祈唔洗（使）傷心，亦都唔洗（使）特登幫襯，7日後自然會證明一切。」

「Joe Wong」就喺fb群組「倫敦人西過渡手記2.0」留言猜測：「『聾瞞』劇本會唔會係咁呢？被『港共政府』加『角（國）安法』逼（迫）到執達史（吏）上門收舖，然後移民走路繼續以『手足』名義呃人呢？」「Bruce Lee」就話：「笑死，『龍門』果然賣完飯券轉頭執笠，你叫課咗金嘅『聾粉』情何以堪呢？」「龍門」經常喺fb宣傳自己派飯券畀班「手足」，仲以「飯券」名義收收埋埋咁多錢，難怪畀人質疑佢今次係咪cap完水就準備走佬啦。

過氣網紅鬧爆黃藝人盲撐

不過，就算面臨眾多質疑，張生依然有死忠粉嘅。日前，佢就出post話感謝藝人梁祖堯去佢嘅尖沙咀店幫手。梁祖堯都全力配合，落手落腳撐場都唔夠，仲要喺facebook發帖宣傳，「我知道以前關於龍門冰室都有好多風波，但係無論如何我會選擇相信，龍門冰室同埋張先生係與香港人同行的。希望大家會繼續支持，好讓龍門冰室渡過呢一個難關！」

雖然佢哋深情戲演得咁賣力，但黃絲好似就唔buy，啲人唔只鬧爆張生，仲燒埋梁祖堯！「初代網紅」邵子風噚日就專登開post鬧爆，直接鬧：「邊個撐龍門，都係傻仔！……做什麼一日店長幫人宣傳！」佢仲揶揄：「老闆真黃假黃，佢自己心知肚明！我起底起到清清楚楚！你演技叻到呃晒咁多真（具）實力演技派演員！你真係好嘢！」

「龍門」過去一直都被指食「人血饅頭」、呃「手足」、「扮黃」，唔少黃絲都對佢非常反感，今次話要執笠都仲係劣評如潮，真係可見「龍門」到底有幾咁乞人憎，黃絲口中嘅「黃色經濟圈」只係一個笑話。