「黃店」見錢開眼係常態，正常人根本就唔會對佢哋抱有任何期望，只有「黃絲」仍然唔明呢個道理。近日有「連登」網民整理出「黃店」「水門泰式海南雞飯專門店」（「水門雞」）嘅兩宗罪，數臭「水門雞」，並將佢踩到變成地底泥，包括「水門雞」老屈其他「黃店」唔係「黃」、以及使用內地雞。更過分嘅係，「黃色水雞」被踢爆原來喺荃灣南豐紗廠間舖係冇攞食環署嘅牌照，真係鑊鑊新鮮鑊鑊甘，令人歎為觀止。

話說，有個叫「孩子飛飛」嘅網民日前喺「連登」發帖，揭穿「水門雞」嘅惡行。佢話由「黃色經濟圈」啱啱開始，「黃色水門雞」就不斷喺facebook出post證明自己行得幾前，「吸引唔少港豬去幫襯佢（包括本人都幫襯過幾次）就算（啲雞）幾難食幾生都會幫襯，甚至做埋雞粉，幫手打壓一D（啲）非黃色水門雞圈既（嘅）人，隨住（着）時間過去，『黃圈』金錢既（嘅）吸引（力），人既（嘅）本性就會浮現……」而「黃色水門雞」就有兩宗罪。

第一宗罪係「老屈黃店」，指「水門雞」以一個「黃店」身份出post，暗示只有佢同另一間「黃店」「清玉」係（元朗）又新街附近嘅「黃店」，其他都係假嘅，搞到事後另一間「黃店」「元朗燒賣皇后」要登報落廣告以證「黃」。同時，佢為咗一家獨大，帶頭話「綠色水門雞」係「藍/鄉黑」，並聲稱對方是「原居民」，但其實人哋都係「黃」嘅。

屈完「亞玉冰室」唔道歉

此外，「水門雞」更曾經聲稱元朗「黃店」「亞玉冰室」老闆搵人打佢，更老屈「亞玉冰室」老闆同「7．21」班白衫有關係，但反而證實咗一切都係假嘅，人哋「亞玉冰室」老闆根本冇做過呢啲事。

不過，「水門雞」就好似無諗過要道歉，根本無聯絡過「亞玉冰室」老闆，真係夠晒狂妄。

而第二宗罪係使用內地雞。「黃圈」聲稱唔會使用內地嘅物資，但「水門雞」就被踢爆向「佳聯」及「耀記」拎冰鮮雞，而「水門雞」亦曾喺網上回應網民，話「雞係大陸阿（內地啊）」。所以「黃店」同佢人設不符，令人好失望喎。

荃灣店被踢爆冇牌照

大家以為「水門雞」啲衰嘢就係得咁多？其他更過分嘅係，有另一名網民「骨頭脆（13歲）」踢爆「水門雞」原來喺荃灣南豐紗廠嘅分店係冇攞食環署嘅牌照，但仍然可以整盆菜開門市，懷疑係無牌經營，真係嚇死人啦。

不過，有網民認為「黃絲」仍會盲撐，「UST南亞仔」話「大把盲粉，大把傻仔信㗎」；「雀屎連加特」認為「黃圈」食相難睇，「黃色批鬥圈，食相十分核突」；「華子安」揶揄：「祝黃水門賺大錢。」■香港文匯報記者　郭家好