2020年港姐亞軍陳楨怡（Celina）出道3年多，最為人所熟悉的是兩年前被爆背着圈外正印男友，與「西貢地王之子」周子揚拍拖，男方之後爆料指她是煙民、虛偽、扮乖女，令她形象插水。經過時間洗禮，Celina未有被負面傳聞打倒，反而積極裝備自己，更揚言會視演戲為終身職業。◆採訪：梁靜儀　攝影：郭木又　場地：劉一手重慶火鍋（ELEMENTS圓方）

Celina在古裝喜劇《狀王之王》中，飾演外國返港的仵作念珊珊，幫助王浩信飾演的宋世傑查案，角色尚算討好。Celina指當時因為要學中醫學針灸手勢，加上當時自己的身體又比較虛弱，於是導演林子聰就介紹了一位稱聲能醫百病的神醫給她，之後又睇了莫文蔚的《算死草》參考如何解剖：「不過我好驚血，我又唔睇恐怖片，所以睇嘅時候skip（跳過）晒前面嗰啲，只係睇解剖。」

Celina又指夥拍一班搞笑之人拍喜劇，每日由返工笑到收工，但有一場戲令她相當難忘，她更因導演一句話而喊不停，不過她反而多謝導演：「肥仔聰（林子聰）係一個好warm嘅人，好似太陽咁，佢走來乜都冇講，但就安慰我，令我諗起一啲唔開心情緒同經歷，好容易就撻着咗我，我就不停喊，喊到第二朝隻眼腫晒，最後場戲一Take過，好多謝佢。」劇中Celina要跟姚子羚兩女爭一男，結果爭輸了，問到現實中遇到這情況是爭取或是放棄？Celina稱不會跟人爭：「我一定唔會做爭到底嗰個，因為我一向唔鍾意同人爭嘢，我係比較佛系，隨緣，因比較怕醜。」

現階段感情放一邊

Celina聲稱現以事業為重，不再去想感情事。問到是否受之前與周子揚的緋聞所影響？她說：「自己無諗太多，做好自己囉，識我嘅人就知道我唔係咁嘅人，如果唔識我嘅人選擇相信，我自己控制唔到，（現時大家已冇瓜葛？）係。」

桃色糾紛過後，她積極「洗底」，跑馬拉松、學劍術，又學演戲，去年底更有份參與拍攝無綫重頭劇《巾幗梟雄之懸崖》，事業現曙光，難怪她暫時亦將感情放埋一邊。對於能跟三屆視帝黎耀祥（祥哥）合作，她亦趁機向對方請教演戲心得，很開心獲祥哥指點講對白時要注意的地方，她說：「我覺得自己講台詞口齒不清，有少少𦧲脷。」她又爆祥哥經常請劇組飲嘢，她都有「萬歲」請大家飲熱飲，因橫店很凍。

視演戲為終身職業的Celina，雖然外表柔弱，但原來武術方面有驚人成績，近年拜師學劍術的她，每星期訓練兩次，幾個月前參加香港國際武術節一分鐘耍劍套路項目更奪得金牌，真的估她不到。Celina表示接觸武術也是無心插柳，話說她兩年前返內地為劇集試鏡，對方要求她在兩星期內學識耍一套「蛇拳」，最後當然落選，但巧合之下認識了師父和師兄，對方指她手長腳長，可以嘗試學耍劍，當時她都好無信心，之後才開始學習。另外，她又學長槍，同樣在該比賽中得金牌。不過她否認是想做打女，只是以備不時之需。問到會否向公司自薦拍動作片？Celina說：「自己未試過，不過可以試吓，放低佛系，攞埋把劍去耍返套蛇拳。」