自薦翻譯新書 耗時近千個鐘

香港文匯報訊（記者 梁靜儀）湯唯去年憑朴贊郁執導的韓片《分手的決心》摘下韓國青龍獎影后，近日她更涉足出版界，親自策劃出版新書《分手的決心—分鏡本》，為慶祝新書前日（7日）出版，她與導演朴贊郁更來港出席新書簽名會，其間更以韓文隔空多謝韓國導演丈夫金泰勇，對於傳出二人婚變，湯唯反問：「點可能呀？」

久未在港露面的湯唯，前晚以白恤衫襯紅色長裙出席活動，淡妝下仍狀態十足，大談新書由籌備到推出的心情。

湯唯表示花了兩年時間去籌備新書：「由開拍電影時已向導演提出可否讓我推出分鏡本中文版本，因為我覺得太好，我以前未見過咁完整嘅分鏡本。導演一開始無答我，只係話可以諗吓，但意思好似係觀察我係咪認真，我講咗兩次之後就冇再講。直到做完康城宣傳，導演突然問我係咪真係想做，我話係呀，我與同事一齊做，用咗近千個鐘做翻譯，有時我先生喺度都好啲，但如果佢有工作唔喺度，我就要等個女瞓咗，先開始翻譯，過程又攰又開心。（老公有幫手翻譯？）老公幫手照顧個女已經係最大幫助，因為我哋有專業翻譯，如果唔係佢幫助，我今日點可能喺呢度呢？因為佢𠵱家喺北京屋企（湊女）。」她笑言推出這本書最大的難度是要向導演展示，她有幾大的決心出版這本書，還有由韓文翻譯成普通話的一環都好難，幸好有專業翻譯，不過有很多問題都是要問導演。

至於會否再將其主演的作品翻譯成其它語言出版？湯唯稱仍是未知數：「咁又未必做到，中文我還可以，其他語言我唔得，而呢一刻都仲未做完，或者會再印，因為都搵到好多問題，翻譯仲未係最完美，睇吓大家鍾唔鍾意先啦。」

收到新書既開心又想喊

她又形容第一次收到新書實物的感覺好開心又想喊：「一開始時大家都唔睇好呢件事真能做好？結果真係做到出來，那刻真係有啲想喊。其實我只不過係一個搬運工，我將一個覺得幾好嘅嘢搬過嚟，分享畀有興趣睇嘅人，不過我哋用咁多精力同時間做到出嚟，真係好開心。」

她笑言最初拍攝時取得分鏡本，還以為是給工作人員睇：「導演問我你睇咗未，佢好期待我答佢好精彩，但我同佢講我睇劇本就得，後來佢叫我睇，一睇我就發覺好易睇又好好睇，好似漫畫書，我係漫畫迷，細個睇好多，睇完我覺得好易睇，又會好清楚來龍去脈，拍攝時大家都好清晰知道自己要做乜，呢樣令我印象深刻，自信一部分係來源於呢本分鏡本。」問到女兒可有看過她的新作？湯唯表示還未，但會預留一本給她，又透露女兒中文最好，雖然韓文都是母語，還有英文。

獲老公支持幫忙湊女

對於早前傳出她與老公金泰勇婚變一事，湯唯很大反應說：「點可能呀？我喺呢度，如果冇我老公，我點做呀？我感謝佢，今次其實好多謝佢，他真係幫我好多。」再問到她與老公是不是分隔兩地？湯唯說：「我見好多鄰居都係父母平日外出工作，周末返嚟，其實真的很辛苦，老公有工作時就飛返韓國，冇工作時就好想陪住我哋兩個。（聖誕一齊過？）我唔畀佢走呀。」之後湯唯笑着用韓文隔空向老公說多謝。

她又透露其後一直居於北京，因要照顧年邁的父母，尤其是她的爸爸今年已80歲，而此行父母亦有陪她來港，因女兒要上學，所以未有跟她來港。出席完活動翌日，湯唯便趕回北京為老公慶祝生日？她笑說：「梗係啦！（點慶祝？）唔話你知，唔可以講，唔可以畀佢知。」

久未演出港產電影的湯唯，對上一套已是《月滿軒尼詩》，她希望有機會再拍港產片。問到會否叫老公試拍港產片？她坦言較難成事：「佢自己啲嘢做完先，佢做，我就唔做，我做，佢就唔做，因為個女一年級好多嘢需要照顧。（兩個好難有合作？）或者都會再見到。」

此外，提到曾合作拍戲的內地男藝人吳秀波，她表示已很久沒有聯絡，問到可有留意對方自爆被人設局害到破產的新聞時，工作人員即以時間緊迫為由帶走她。