香港文匯報訊（記者 文芬）洪嘉豪日前接受《StarTalk》節目主播許文軒（Edmond）訪問，大談推出專輯《Learning Curve》感受。嘉豪說：「裏面有五首歌，曲詞編監唱同Mixing都係自己一腳踢，我覺得最困難係Mixing。（讀Audio，乜唔係強項咩？） 我最初都以為係，但點知剪得唔夠精準，所以我搵咗個同學幫我執手尾。」

嘉豪在2019年進入迷失期，談及與張敬軒關係，他說：「軒仔就好似哥哥咁，佢好支持我，佢鼓勵我試吓做音樂，試吓唱歌，冇佢我真係開始唔到，佢送咗好多器材畀我，教我製作Demo，呢隻碟我創作嘅歌都係用佢啲器材做。之前做佢紅館嘉賓，冇諗過佢送返我喺佢澳門個唱綵排時幫佢試聲嗰支紅色咪，我真係反應唔嚟，受寵若驚，同埋嗰支唔係咪咁簡單，係一支棒，佢好似交咗支棒畀我，叫我要好好努力，𠵱家好似有個重擔咁，唔可以丟佢架，呢份禮物真係好大壓力！」