香港文匯報訊（記者 梁靜儀）王浩信、王敏奕、黎諾懿、袁偉豪及黃智雯等，昨日到將軍澳電視城出席劇集《刑偵日記》（刑偵）宣傳，為配合《2020東京奧運會》，一眾藝員即場乒乓球比拚，最後由王浩信一組勝出。有傳《刑偵》收視未如理想，陳自瑤（Yoyo）首次做女一的劇集《選美的12夜》（暫名）亦受影響，王浩信相信劇集收視會反彈，亦有叫太太加油。

王浩信被讚打乒乓波時有板有眼，他表示小學有接受過校隊訓練，到中學就轉打籃球及羽毛球，他笑說：「身高有優勢，手長腳長易掂到個波。」有傳無綫將舉行水運會，問到他可會參加？王浩信說：「我識游水但唔叻，係唔會浸死嗰隻。」他又趁機為香港隊運動員加油，又表示很喜歡羽毛球選手伍家朗，之前有幸跟對方打過波，覺得他的心理質素很高，特別對他之前對林丹的賽事印象好深刻，有姿勢有實際，有信心他能奪獎牌。

《刑偵》劇將於下周一播映大結局，問到可有信心收視反彈？他說：「有信心收視會反彈，希望有廿幾點，因為好多觀眾都喺唔同平台睇咗，收視唔代表到劇集質素，對收視亦冇失望，因為係合拍劇，劇集喺內地嘅迴響，反映對香港電視劇多一分認同，我會繼續努力。」

王敏奕喊戲感動導演

有指因《刑偵》收視未如理想，令到未開拍的新劇要重新審批劇本，連累太太陳自瑤（Yoyo）首次做女一的劇集《選美的12夜》（暫名）亦受影響，對此王浩信說：「都唔關事，行政上等公司處理。（有冇安慰太太？）都有叫佢加油努力，佢嘅努力公司會睇到，做演員嘅難處就係咁被動，大家繼續努力。」

王敏奕預告在結局篇中會有因王浩信其中一個人格死去而喊到崩潰的戲份，她指拍攝時更喊了幾個鐘，就連導演都感動到喊。問到是否喊到很樣衰？她笑說：「見仁見智，但我見猶憐。」談及運動方面，王敏奕表示喜歡游水、籃球、羽毛球、跑步，以前曾是學校田徑隊及泳隊隊員，問到可會參加無綫的水運會？她表示現時正忙於拍劇，應該不會參加了。

黎諾懿近日宣布太太李潔瑩再度懷孕，已有一子的他一直恨生女，問到第2胎是否生女時，他指都是大家自己估，至於胎兒性別，暫時就要賣關子：「今胎留返畀太太宣布，今胎可能係最後一胎，無論係仔定女都會『封肚』唔再生，兩個已夠。」他指因為湊小朋友真的好辛苦，好像現在放暑假，他每日都要諗帶兒子「小春雞」去哪裏玩已經很攰。問到他可有告知朋友BB性別？諾懿坦白說： 「鄭伊健同佢老婆蒙嘉慧都知，相信佢哋唔會講，就算講咗都唔緊要。」諾懿指太太今胎很想影大肚相：「因為生第一胎真係好忙，冇影大肚相、BB相，所以今次會做返。」