黃絲近日猛捧《蘋果日報》做「民主最後堡壘」，但好多人唔係咁睇囉，特別係班所謂「勇武派」。有「連登仔」近日就開post贈慶，回帶返《蘋果》過去為香港「民主」作出嘅「貢獻」，包括前年報道暴徒經下水道逃離正被警方包圍嘅理工大學，一邊聲稱要保護「義士」，但就公開理大暴動中242名被捕者嘅姓名、年齡同職業；報道醜化激進「本土派」嘅新聞。唔少網民都話一直覺得《蘋果》嘅報道手法好有問題，只係因為冇得揀先逼住撐，甚至有人話肥佬黎坐監係「自己拎嚟」。

網民「椰子奶燉貓」近日喺「連登」貼出多個《蘋果》新聞報道嘅版面，話要同大家回顧吓《蘋果》對香港「民主」嘅「貢獻」，其中最經典嘅莫過於前年警方包圍理大期間，《蘋果》詳細報道「勇武」經下水道逃亡嘅細節。當時，《蘋果》已經一度被黃絲質疑係出賣「義士」。其後，《蘋果》仲詳列喺理大暴動中242名被捕者嘅名單，並因此被批評公開「手足」資料。

仲記得2014年「本土派」初初冒起嗰陣，極力維護傳統「泛民」利益嘅黎智英開始利用《蘋果》百般醜化激進「本土派」，呢個「連登」post入面就有唔少相關例子，包括黎智英曾喺其旗下網台節目《壹錘定音》承認叫公司高層「千祈唔好俾（畀）啲談『本土化』嘅人講咁多嘢」，同埋《蘋果》多次製作批評、揶揄前「本土民主前線」發言人梁天琦、「青年新政」嘅梁頌恆、游蕙禎嘅報道。

呢個post又提到去年7月大批黃絲要求傳統「泛民」辭任立法會議員嗰陣，黎智英竟然喺直播表明希望「泛民」繼續留低，《蘋果》亦喺頭版刊登以立法會會議廳為背景，印有所謂「堅守議員戰線 擋惡法抗強權」嘅全版廣告。

網民批報道編採有問題

望住《蘋果》呢啲抹不走嘅歷史事跡，「五仁月餅好好食」就話：「《蘋果》幾黃都好，做野（嘢）有時憨×係事實。」「零八的傷痛」亦直言：「《蘋果》嘅報導（道）手法同編採手法一直都有問題，肥佬黎帶頭攻擊『本土派』亦係一直發生嘅事。」

不過，「矮窮×死肥毒」就死撐：「老老實實，啲高層都俾人拉×哂（晒），就算以前有野（嘢）做得唔好，今鋪都要盲撐㗎啦。」「龍歪歪」反駁：「原諒人之前，首先係要對方認咗錯同道歉先。」有網民提到肥佬黎今次可能坐一世監，「Tony_Stark」就話：「佢自己拎嚟，抵死㗎。」

●香港文匯報記者 雨航