香港文匯報訊（記者 梁靜儀）Super Girls（SG）成員蔡明思（Jessica）早前首次為牙刷品牌拍攝代言廣告， 她直言是「成就解鎖」。

Jessica表示入行後有三種廣告想拍攝：「第一個係同牙齒有關產品，另外係快餐店或者衞生巾，快餐店廣告拍過，終於可以拍攝到牙齒有關的產品廣告好開心。」拍攝當日，Jessica拿着牙刷狂刷牙，由早刷到晚，難怪她笑言是她一年刷牙次數總和，她笑說︰「拍攝當日刷咗好多次牙，我諗我刷咗成年次數嘅牙齒，因為已經刷得太多次，但牙肉反而唔痛，我都覺得幾驚喜。」

Jessica表示疫情關係，老公化身導演幫她在屋企做廣告casting，她說：「老公幫我揸機操刀拍攝試鏡片段，佢好認真幫我拍咗好多個角度，當正自己係導演咁，佢仲讚自己拍得非常好，中咗廣告要分一半酬勞畀佢，不過我只會請佢食餐飯，因為我啲錢都係屬於我嘅！」雖然老公未能瓜分酬勞，但Jesscia指老公因由細到大都愛用這牙刷品牌，都非常落力向身邊朋友推介，笑指老公是「人肉宣傳易」。