網民譏俾人偷錢慘過核爆 揶揄這才是「違法達義」

唔少黃店為咗借黃搵食，都誓神劈願話會保護「手足」核爆都唔割，之但係當牽涉錢銀，咪又係「反轉豬肚」。好似黃店「鳳鳴石磨腸粉」日前就喺fb上載咗名「手足」嘅多張大頭照片，稱該「手足」喺舖頭穿櫃桶底「反轉豬肚偷返『自己人』錢」，仲警告：「今日之內攞返錢出黎（嚟），否則後果自負！」唔少網民都揶揄話：「事實證明，俾人偷錢慘過核爆。」●香港文匯報記者 黃書蘭

黃店「鳳鳴石磨腸粉」喺帖文咁講：「觀塘鋪（舖）俾一位員工偷晒尋（噚）日營業額之餘，仲要偷埋其他員工錢……見工講到大家相同理念，仲話不停俾人迫害，一定會努力做，但簽完約過幾日就偷錢走埋佬。成日鬧世界不公，但自身係咪行得正企得正先！做野（嘢）有無用心先？麻煩今日之內攞返錢出黎（嚟），否則後果自負！」

該店假惺惺地稱：「本身都唔打算公開，但希望藉今次事件同行大家注意一下。佢用埋『太空卡』（電話卡）同住賓館，真係話失蹤就失蹤。如果佢淨係偷公司錢事少（小），仲要搞到其他員工都不知所措！」仲Hashtag「手足唔係大×晒」。

「鳳鳴石磨腸粉」今次公開篤灰，唔少黃絲竟然唔覺得嗰位偷錢嘅「手足」有問題，反而鬧返間黃店老闆。「Chiang KA Yiu」話：「下（吓），為佐（咗）幾千蚊就要篤灰？『手足』係（喺）前線嘅時候，你去佐（咗）邊？佢幫你捱子彈嫁（㗎）！依嫁（𠵱家）少少事就玩搞大？」

「Wuiman Cheng」就話：「錢無左（咗）咪再搵過，再唔係咪眾籌囉！『手足』少一個就少一個，我哋點解唔體諒下佢，可能有事急用呢？係咪依（）家先黎（嚟）計，先黎（嚟）玩割蓆（席）？」

「Johonny MA」話：「呢間黃店篤灰我以後都唔再撐！」

亦有黃絲就唔肯承認偷錢嘅係「手足」，「Yau Francisco」話：「好明顯扮『手足』啦……睇佢個樣似出嚟行多d（啲）。」

諷「要盲撐可以是非不分」

不過，始終都有思路正常啲嘅網民。「Joseph Lee」話：「睇到啲留言真係笑死我！做咗衰嘢就唔係『手足』！真係服咗你地（哋），清醒下（吓）啦唔該！以（𠵱）家就係呢啲『手足』一直在社會上偷呃拐騙呀……」

「Vincent Kwok」就話：「D（啲）人真係黐×左（咗）線，偷嘢就係偷嘢，……一個人要盲撐，可以去到是非黑白不分，呢D（啲）正×街、難聽過粗口……」

「Kaye Wong」就揶揄「手足」質素係咁上下啦：「違法達義嘛……」