攬炒派成日標榜要建立「黃色經濟圈」、杯葛其他商戶，結果就害人終害己。好似民主黨屯門區議員盧俊宇日前就喺facebook發帖，宣稱自己同攬炒派劉小麗參與柴灣「黃店」「蘇爺甜品」嘅活動，呼籲「手足」繼續支持「良心商店」。不過，唔少「手足」都異口同聲話「蘇爺甜品」係柴灣區內出名「藍店」，鬧爆盧俊宇同劉小麗妄想同「藍店」「洗白」：「咁樣只會令你兩個自討沒趣。」

盧俊宇日前喺fb打卡，佢話：「很開心能與小麗老師（劉小麗）一同參與『黃店』『蘇爺』的愛心糖水分享活動。小麗老師都加油呀，大家都繼續支持『良心商店』呀！」佢仲「Hashtag」「一起的撐」，似足幫「蘇爺」賣廣告。

不過，柴灣「手足」好快就踢爆有人「不分黃藍」。「Alice Wong」以「民主黨成功爭取『藍店』變『黃店』」為題發帖話：「『蘇爺甜品』係柴灣區出名『藍店』，完全唔明白盧俊宇可以係（喺）完全冇fc（查證）底下表態話係『黃店』。一句低調『黃』就可以做『黃店』？另外，該團隊多次用許智峯名義多次抹黑區內『黃店』，今次仲變本加厲，公開支持『藍店』，實屬低劣可恥。」佢仲上載埋網頁搜尋器截圖，顯示「蘇爺甜品」俾「黑暴」網站標籤為「藍店」。

「Tang Tae Ha」都話：「柴灣20年街坊here（在此），呢間『藍店』嚟㗎喎！」

「手足」譏有人要「丟架」

有「手足」就笑有人跨區造假，自己要丟架。「Chak Kuen Chan」話：「屯門區議員誇（跨）海介紹『藍店』加入『黃色經濟圈』？」

「Carrie Wu」就話：「盧俊宇、Lau Siu Lai（劉小麗）請你兩個唔好妄想同嘗試同『藍店』『洗白』，咁樣只會令你兩個自討沒趣……」 ●香港文匯報記者 黃書蘭