香港樓價多年嚟冠絕全球，就算畀咗首期都隨時供餐死，所以保住份工真係好重要㗎，睇吓民主黨議員鄺俊宇咁努力爭取延任就知啦。近日有市民就整咗張改圖嘅banner揶揄攬炒派，話佢哋就算面對質疑都要延任係有苦衷㗎，例如鄺俊宇就要繼續供樓，突然冇咗份工點得呢？有網民就建議鄺俊宇多啲搞眾籌，喺「手足」身上榨多啲錢就可以早日供完層樓，到時冇咗份工都唔使憂嘞！

早前有傳媒發現，出身公屋嘅鄺俊宇，原來喺2018年已經買入咗大角咀「利奧坊．凱岸」一個單位嘅樓花，並喺今年4月正式成為呢個千萬單位嘅業主，除開計算，呢個實用面積417平方呎嘅單位，平均呎價近24,700元。

經濟壓力大自然唔可以冇咗份工，所以整banner嘅市民就將鄺俊宇喊得好淒慘嘅樣key咗上去，仲幫佢設計咗內心對白：「大佬我仲要供樓！」

不過，網民似乎就好似冇乜「同理心」嘞，「Wai Man Lam」毫不留情咁話：「佢終於知道要搵食係乜，幾多人比（俾）佢之前有份破壞社會而無工做，人地（哋）唔使養家供樓咩，根本所謂帶住民主嘅人全部都自私，只為自己，無諗後果同其他人，宜（𠵱）家香港分裂到乜野（嘢）地步，我口衰講句，你抵死！」「Louis Wong」亦話佢自己攞嚟：「你支持攬炒破壞法治同社會經濟果（嗰）陣有冇諗過好多人因為公司被迫關門而失業？」

網民揶揄多搞眾籌唔使愁

「Queenie Chan」就揶揄：「洗（使）乜驚，有200萬『手足』幫你，一人一蚊都夠晒啦，仲有淨（剩）落袋（𠻹）！」「Sukching Lam」就建議：「眾籌！好多人樂意俾（畀）。」「Garter Green」就回應：「即刻供斷層樓都得，佢手揸好多眾籌，所以先出嚟買樓，因為再住公屋，要入息審查，到時成盤數俾房署睇晒。」「Jerry Chan」就話攬炒派其實好簡單：「做咩都得，最緊要有糧支（出）！」 ■香港文匯報記者 雨航