香港文匯報訊（記者 梁靜儀）陳自瑤（Yoyo）、賴慰玲（Winki）、黎諾懿及羅天宇主持的《香港婚後事》，昨晚播出一集的嘉賓是姚子羚（Elaine）。作為單身貴族，Elaine坦言對愛情仍然有憧憬，但不會強求，她說：「唔係要搵一個人結婚，而係要遇到一個適合你嘅人，我𠵱家唔係去求職，對我嚟講婚姻係一生一世嘅事。」她坦言曾遇過想結婚的對象：「但現在回頭望返，嗰個人並唔係可以同我行落去嘅人，可能我最終會離婚，當你唔開心、迷惘嘅時候，往往呢啲人走出嚟嘅時候，通常都係錯嘅，因為你喺最迷失嘅時候，只要有個人行埋嚟，你就會覺得佢好好，經歷咗呢啲事你就realize，啱就係啱，唔啱就係唔啱。」

Elaine又自爆讀書時試過異地戀：「喺澳洲讀書時，男朋友係馬來西亞人，讀完書之後我返咗嚟香港，佢就返咗馬來西亞，最終就分開咗，雖然我嗰時係讀communication（傳理），但我本身唔係好識交流。」至於能否接受與廿多歲的小鮮肉拍拖？Elaine笑言：「廿幾歲，正吖！」之後再正色道：「我諗我未必得，雖然我Keep得幾好，我望落去都似廿幾歲之嘛，如果（相差）5年之內就OK。」