（香港文匯報記者 阿祖）《The Nextwave 沙灘音樂節》早前公布演出陣容，樂迷反應熱烈，早鳥門票被秒殺搶購，主辦單位近日新增歌手名單包括周殷廷、Tyson Yoshi、陳柏宇及黃妍亦將登陸沙灘音樂節舞台。

Tyson Yoshi每次音樂節都被要求「騷肌」，他笑言盡量滿足大家的「訴求」：「我想台下搵啲大隻過我嘅人上嚟，一齊睇吓啲肌肉！其實我地去海灘都尷尬，會比人眼望望，但參加呢啲沙灘音樂節就可以大解放，大家享受舞台點狂歡都唔怕。」

剛完成個唱的周殷廷亦成音樂節演出歌手，他表示「小休」數日要為演出綵排：「演唱會反應非常好，所以團隊都好緊張之後嘅演出，想放多兩日假都要取消，做呢行忙碌係好事嚟嘅，如果之前個唱買唔到飛，咪嚟呢度陪我玩水啦，今次表演嘅距離應該好近，同大家好多互動。」

陳柏宇表示盼與家人齊參與，但擔心音響太強影響愛女：「去沙灘玩水、睇爸爸表演梗係正，但唔知佢地太細個入唔入得場，同埋其他表演單位都可能好Rock，太大聲到時又崩潰唔知點收科，唔通要抱埋佢上台一齊唱咩？留返俾老婆決定去唔去啦～」Jason就提議黃妍泳衣上陣，盡情享受沙灘舞台，不好收收埋埋，是時候展示另一種魅力。

黃妍聞言就大叫「啋」，笑言煩惱歌單無暇諗服飾：「因為我啲歌都係輕快為主，希望大家可以跟住節奏大合唱！聽聞買飛嘅觀眾好似有車抽獎，可能大家到時有歌聽有奬抽，就冇所謂我著咩呢，其實呢啲大型户外Party真係好正好好Feel，大家平時返工都幾大壓力，嚟到可以好癲咁玩番日。」