香港文匯報訊（記者 梁靜儀）方力申（小方）與黃翠如主持的無綫節目《拍檔廚房》，昨日於將軍澳電視城錄影，是集嘉賓有梁競徽與陳煒。

翠如與小方不單有緣合作主持節目，原來二人的弟妹亦一起共事，翠如透露從小方口中得知妹妹近日在小方弟弟的畫廊工作：「我細妹係好典型愛自由嘅人，鍾意喺唔同地方打工，佢第一次做全職就係今次，我作為二家姐聽到後好感動。」翠如又指感謝小方一家人，因妹妹在他們身上學習到很多。

小方近日成了封面人物，有報道將他與陳曉華的緋聞擺上枱，令女友葉萱（Maple）不滿，為免女友唔開心，小方即主動作出澄清：「以前講我就冇乜所謂，但以前係單身，現在有另一半，我會被人『照肺』，可能我喺女友屋企人心目中形象受損，所以我都幾緊張。」他又笑指該單緋聞已是兩年前的事，是否近日冇新聞？

不過小方也承認緋聞與他的確有關，他說：「可能最近宣傳《逆天奇案2》，我做訪問時講自己好難得到圈外女友信任，因為咁多年來有好多緋聞令到我個底好花，但出到來就好似自認個底好花，因而令人乘虛而入。」小方又稱當然沒有追過陳曉華，大家更一起合作拍過劇集《美麗戰場》。

問到女友看到新聞時反應，小方指女友最不滿是她的相片唔靚：「我當然第一時間向女友『自爆』，被佢發現就唔得了，女友話張相好醜，我當然覺得佢現在靚過張相，真人靚啲，賣晒口乖，可能媒體冇影過我哋同框嘅相，以為我哋感情有問題，事實上感情好好，好穩定，（可會影合照提供新相？）有一刻有想過，但我做人一向低調，從來唔放閃，所以放棄咗。」

梁競徽感激郭珮文澄清抽水傳聞

另外，梁競徽與陳煒（煒哥）會比拚廚藝，煒哥透露要煮7道菜。問到梁競徽可有信心撼贏煒哥？他笑說：「唔一定要贏，可以同煒哥係廚藝上切磋交流，自己最弱係整甜品，因為自己唔食，但都有整畀仔女食。」

提到早前上《獎門人》節目時，被指疑以觸碰到「最強Body」郭珮文的胸部？他指觀眾幾犀利：「正常速度下係唔會睇到呢個畫面，玩遊戲時應該係掂到，係好正常，但我同文文（郭珮文）都feel唔到有咩，唔係如標題所指。」

梁競徽又指這種新聞對男人來說是很嚴重的指控：「因為指控係非禮，係刑事，有啲人睇咗標題就會信，即使內文有澄清但對藝人都仍有好大影響，對我幾困擾同影響，我經理人及同事仲幫我做精神輔導，開導我。」他坦言有想過澄清，但怕越描越黑，並很感激郭珮文主動澄清事件，他說：「寧願話我遲到、早退、激她，有時有啲嘢唔講得笑。」