香港文匯報訊（記者 梁靜儀）張敬軒（軒仔）昨日到沙田馬場擔任表演嘉賓。軒仔表示與馬場很有緣，當年參加人生第一個樂壇頒獎禮，也是在馬場舉行。他又笑言為了這次演出，跟馬匹一樣，晨早便起身操練。獲大批粉絲入場支持的軒仔，一口氣唱出3首歌曲。

演出後軒仔接受傳媒訪問，被發現所穿的褲子有少少透視，他即低頭望望，十分搞笑。軒仔表示已第3次入馬場表演，他笑說：「佢哋話凡係有投注嘅地方都好講『老黎』（好運），我都希望自己做一個『老黎』嘅開幕嘉賓，我屬猴，應該好好運。」談到騎師麥偉利曾被指跟他撞樣，軒仔笑言昨日雖未能與對方碰面，但二人早已成為筆友，間中傳訊息聯絡。

軒仔亦透露與馬匹有淵源，曾於騎術學校學過騎馬兩年，他說：「之前因為演一個與馬有關嘅舞台劇，學過幾堂，後來去菲律賓做騷，場地旁邊有個海灘，有啲退役嘅馬畀客人騎，我玩咗一日就愛上，不過因為唔識用力，磨傷咗大腿內側，第二日要擘大對腳行路，而且動物都鍾意聽歌，我喺馬術學校唱《酷愛》，啲馬會走過來圍住我，可能佢哋聽到我唱『愛愛愛』，以為我求偶。」

問到可有想過做馬主？軒仔稱會視做馬主為人生目標：「因為係成功人士嘅認可，不過要養掂自己先，我有諗過第時隻馬個名叫『軒軒有力』。」他又透露有朋友是馬主，還是馬癡，世界各地都有養馬。問到可會跟對方夾份做馬主？軒仔聞言即說：「我睇見佢個個月出糧就驚。」喜歡動物的軒仔透露另一目標是想開農場。

COLLAR經歷花蓮地震

昨日COLLAR成員蘇雅琳（Ivy So)、許軼（Day）、王家晴（Candy）、林作與女友裕美等亦有現身馬場。COLLAR早前到台灣進行拍攝兼順道旅行，更經歷了花蓮地震，Day說：「因為第一次經歷地震，都有啲驚，我同Winka（陳泳伽）出咗去食早餐，食食吓見到天花吊燈吊吊揈，嚇到我即刻匿入枱底，不過張枱好似好唔穩陣咁。」Ivy So則表示當時在酒店睡覺，但都被震醒了，她說：「扎醒嗰下以為自己上咗架貨車，搖得好勁。」而正在考試的Candy當時身在香港，她知道台灣地震後相當擔心，即時發訊息慰問Ivy So，得悉大家平安才放下心頭大石。

Day被問到曾與她傳緋聞的《全民造星V》參賽者魏念恩（Nathan），上月於網上發布「死亡預告」後企圖輕生，Day表示自己也不清楚細節，但事發後也有慰問對方，對方亦有回覆她一句「平安」，之後大家都忙，沒有再聯絡。