香港文匯報訊（記者 梁靜儀）兩屆金像影帝得主鄭則仕演足50年堅守一個原則獲讚勁專業，冼靖峰感激鄭則仕全程無私指導：「佢連Off cam之後返到屋企都會再Text我，教我邊場邊場可以注意啲乜，臨尾仲一定加句：『希望你拍攝順利啦』，呢啲前輩邊度搵?」

鄭則仕（Kent哥）、冼靖峰(Archie)、蕭正楠、樊亦敏、曹永廉主演的無綫劇集《神耆小子》，將於下周一(5月6日)播映，跟Kent哥認識了近三十年的監製王偉仁（Simon），二人再次結緣，他為了凸顯Kent哥錢大海一角的霸道，專誠為其設計了「老虎狗」Image，指Kent哥是整套劇集的靈魂人物，並大讚Kent哥專業，永遠唔會遲到，例必比通告時間早半小時到做準備，好值得欣賞。

劇中Kent哥的主要對手是劇壇新丁Archie，雖然二人演齡差距頗大，但演出卻一拍即合，IT專有名詞的對白亦應付自如，Archie笑言全靠Kent哥貼身指點，並細數Kent哥3大暖心行徑:「首先是教講對白加揣摩角色，然後是近乎24小時貼身指導及慰問，第三點則是樂於與後輩分享人生經驗。他說:「由Day1到最後一日，Kent哥都係教緊我嘢，佢知我演戲經驗好少，不唔單止教我講對白，又教我他分析及揣摩角色對於故仔嘅功能，每拍完一場戲，休息時間他都會講解返場戲點解要咁做，拍完戲一齊食飯，他又會講自己嘅相關經驗、教我好裝備自己，佢連Off cam之後返到屋企，都會再Text我，教我邊場邊場可以注意啲乜，臨尾仲一定加句：『希望你拍攝順利啦』。Kent哥又會同我傾偈時教我好多人生道理，用佢嘅人生經驗教我點去看待自己嘅事業。」

到劇集拍完，Archie去拍《亞洲超星團》都仍收到Kent哥問候:「差唔多每兩、三日就同我講加油，問我咩狀況、有冇咩困難？呢啲前輩邊度搵？」

與Kent哥投緣的Archie，坦言對方與自己已過身的爺爺很相像：「都係佻皮得嚟又有威嚴，一開始都驚佢架，之後愈嚟愈唔怕佢。」Archie還感激樊亦敏（Amy）的提點：「我平時會睇多啲IT嘅嘢，呢個係Amy姐教我嘅，到我睇劇本時我就知個term講緊咩，就可以好有自信咁講到出嚟，咁角色嘅說服性會強好多。」

另外，Kent哥與蕭正楠亦有大量「廝殺」場口，二人不但經常口角，其中一幕蕭正楠更會喪扯Kent哥底衫大玩對質互數。