香港文匯報訊（記者 梁靜儀）陳展鵬、林夏薇、方力申（小方）、馮盈盈及劉佩玥等昨日到荃灣出席劇集《逆天奇案 2》宣傳，現場除有周吉佩獻唱劇集主題曲《逆襲》外，陳展鵬更拖住薇薇唱出插曲《後悔萬年》，展鵬更笑言打算跟公司解約，以便參加歌唱比賽。

活動後展與薇薇一起接受訪問，二人被問到劇中會否復合？薇薇透露之前雖已拒絕過展鵬，但之後會有進展，進展中可能都會有眼淚要流。問到展鵬現實中可試過俾女生拒絕？ 他笑說：「我近期都試過，被自己個親生女拒絕係好心痛，仲慘過以前後生被女朋友拒絕。」

前晚播出的一集，薇薇為查案不惜穿緊身衫加熱褲扮流鶯查案，薇薇卻稱不覺得太性感：「拉鍊拉到上頸，但拍嗰陣係最弗嘅時候，播出後手機就不停響，當時我睇緊阿峯（堂兄林峯）部電影首映。」她又大讚堂兄阿峯身手好，打得好勁，現在與他出街都好有安全感，而劇情又有人情味，睇到她都有喊。說到有機會開拍《逆天3》？展鵬表示劇組很溫暖好開心，而這種默契就是港劇受歡迎的原因，生活就是戲，戲就是生活。

林夏薇誇讚陳展鵬歌藝

首次在商場公開獻唱劇集插曲的展鵬，自爆獻唱時有少少甩嘴，只是大家睇唔出，又稱記歌詞沒以前叻。薇薇就大讚他唱得好有感情，唱得好到似「咪咀」。問到展鵬可有興趣再唱歌？他笑說：「直情要參加《中年好聲音3》啦！（合約藝員不能參加？）咪唔做TVB份工，解約參加先，之後再簽返。出面商場同登台，全部都係《中2》。（搶晒飯碗？）咪係囉，你睇fans多到，成功得咁緊要，解咗約先，有幾場比賽都OK喇。（再簽約變8,000蚊底薪約？）唔緊要，出面戶外騷多嘛，既然大家鍾意我唱歌，就咁啦。」問到他可有簽公司的唱片部？他笑說：「佢哋唔肯簽我，都唔知點解？可能有合約，所以應該要解約，講真㗎。（同公司仲有幾耐合約？）我係修哥嗰啲，簽到退休。」

盈盈提議小方派泳裝福利

方力申對於劇中的身份被揭穿，他表示其角色與張頴康是朋友，若對方是奸，他都是奸。小方又稱今次的角色很大壓力，因監製要求他減肥，又不能健身和曬太陽，而他稍後便到內地舉行音樂會，但劇組還有4個飯局，他還準備為音樂會修身減肥，又指不見盈盈出席飯局。問到二人若收視再攀升如何答謝觀眾？盈盈即提議小方可着泳裝，小方就說：「我游水都着泳褲，但無人想睇！」之後盈盈就稱下次宣傳可到小方的游泳學校，大家就可以一齊着泳衣。至於劇集收視好可有帶挈二人工作量？小方表示音樂會由4場加至6場，現計劃之後在澳門及香港開騷。正在學唱歌的盈盈就自薦可做嘉賓，又自嘲請她做嘉賓有好處，對比會好大，可抬高歌手的功力。