（香港文匯報記者 梁靜儀）鄭俊弘首度挑戰演植物人眼都冇得眨，郭柏妍搣甩純純兔形象化身恐怖情人，擸刀威脅鄭俊弘殉情勁嚇人。

昨晚（10日）播出的《逆天奇案2》其中一個單元「廢屋枯骨案」終於告一段落，首先O記探員在荒廢村屋發現一副30年的女性骸骨及染了精液的小背心，經過調查後發現死者是王珊珊（郭柏妍Rosita飾），事件牽涉當年因交通意外變成植物人的豪門四少馬家強（鄭俊弘Fred飾）。經過DNA檢測，證實王珊珊小背心的精液是家強留下，家強因而蒙上姦殺珊珊之嫌；後經O記深入調查，發現王珊珊原來是有婦之夫家強的秘密情人，案件由姦殺案轉為情殺案！但實情唔止咁簡單，O記請來冠峰（方力申飾）利用「腦波儀」讓家強「說出」三十年前真相。原來珊珊當年對家強愛得不能自拔，並相約他在村屋殉情，惟家強貪生怕死不欲共赴黃泉，珊珊即持刀自插心口自殺以圖永遠留在家強心中：「你唔肯跟我一齊走，我要留喺你心入面，我要你記我一世！」家強跑出屋外求助期間意外被汽車撞到變成植物人，珊珊的屍體亦因此沒被人發現！案件最終驚揭是一宗橫跨30年的愛情悲劇，實在令人意想不到。

首度扮演植物人的Fred透露事前做了不少功課做準備：「有上網做Research研究角色係因咩事而變植物人，因為有啲植物人係可以郁到對眼，但我個Case係對眼郁唔到嘅，眼又眨唔到、又表達唔到自己嘅情緒，劇情係講小方訪問我時，我係有好多哀愁情緒，但係表達唔到出嚟，呢一點係最難。」Fred又笑言拍攝過程其實蠻舒服：「拍攝時又唔使全日都瞓喺度，一Cut機就可以郁，唔辛苦之餘仲幾舒服，又有冷氣歎同有床瞓！」談到劇中化老妝，他表示兩個鐘內便完成，見到自己的老了的樣子覺得幾得意。Fred又大讚劇中「情人」Rosita是一個用心和勤力的新進演員。

Rosita是次搣甩純純兔形象化身恐怖情人，拿着生果刀威脅Fred殉情的樣子甚是嚇人，而她亦指角色很有挑戰性：「第一次演呢類型嘅角色，雖然出現集數唔係好多，但呢個角色有一個好圓滿嘅成長過程，覺得好好玩、好有挑戰性，多謝導演同製作組畀咗好多空間我去做得更加好。」提到劇中殉情戲，Rosita坦言心情難受：「呢場戲內心好壓抑，拍完之後都覺得好唔開心，希望觀眾都能夠感受到我嘅嗰種無力感！」