香港文匯報訊（記者 梁靜儀）張敬軒（軒仔）前晚於紅館舉行尾場演唱會，當晚安歌了5次，唱到超過凌晨1點，最後軒仔以一曲詩歌《遇見神》為合共26場演唱會畫上完美句號，同時亦是軒仔人生第50場紅館演唱會，可謂別具意義。當晚有不少圈中人前往捧場，包括楊受成夫婦、霍啟剛與胞弟霍啟山、陳潔靈、谷德昭與女友、陳山聰、泳兒、衛詩雅、周家怡、許靖韻及曾樂彤等。

來到尾場，軒仔請來好朋友王菀之（Ivana）擔任表演嘉賓。尾場氣氛高漲，軒仔愈唱愈起勁，最後安歌了5次才結束。完騷後軒仔在後台接受訪問，對於26場演唱會終於完成，軒仔給自己表現打80分，扣了20分是因有機件故障，因他覺得每晚都要保持一定水準。談到每晚都因Encore超時，軒仔坦言罰款已過百萬元：「基本上由第一日已四五度Encore，若果唔係紅館有限制，粉絲企幾耐，我唱幾耐都得，因為呢啲係愛，又好難得老闆楊生（楊受成）覺得開心，尤其是香港呢幾個月有疫情係好需要娛樂，我都希望大家盡興而歸。我都有打電話畀楊老闆話唔好意思，但老闆話濕濕碎，應使得使，冇嘢緊要得過我嘅支持者對我嘅支持，特別𠵱家樂壇有新局面，但我依然有咁多人支持我，係好需要珍惜。」

今次演唱會請來眾多嘉賓，軒仔稱每位嘉賓到來已是一份最好的禮物，他又說：「其實我係唔主張嘉賓送禮物，但個個都送，好似我榮休演唱會一樣。（如何報答他們？）私底下都會約佢哋食飯，在心中，以後無論公、私事都兩肋插刀。」

成立舞者獎學金助年輕人

對於視他為偶像的冼靖峰（Archie）未獲邀任嘉賓，引起對方粉絲不滿？軒仔表示網上大家可自由發表意見，粉絲的角度很單純，只想自己的偶像得到多些曝光率及機會，他說：「我有傳短信畀Archie，佢亦有同我講，話希望呢幾日嘅新聞冇影響我，我有叫佢加油，及快啲有自己作品，有多啲作品畀觀眾記住，比起做嘉賓更有意義，可能將來有機會大家合作，同埋佢哋同我剛入行時一樣，待人接物、應對傳媒及粉絲之間嘅維繫再磨練吓。」

談到他在台上宣布將會成立舞者獎學金，軒仔稱今次演唱會有很多舞蹈員為追夢都不容易，有的為了學跳舞更一日打三份工，自己能夠為社會做多些事是應該的，故好想幫助基層及各種原因負擔不起學舞的年輕人。軒仔又表示第一輪自己會先拿出7位數字資金開展計劃，但同步都會叫老闆楊生幫手及找贊助、舉辦慈善籌款，但基金一定不會以他個人命名。