香港文匯報訊（記者 阿祖）由林柏希主持的網上平台BOX channel節目《月傾會》，最新一集請到伍詠薇（伍姑娘）做嘉賓。伍姑娘2013年曾經離開TVB，當時報道有指伍姑娘曾被女高層羞辱。伍姑娘表示女高層約她在會議室開會再傾角色，但女高層卻罵她，指主角都未知劇情已給她知了很多，又說她想多爭戲份偏要寫個「棟」喺度角色給她。伍姑娘說：「我嗰下真係着（生氣）啦！我真係走，我話唔該晒，咁我考慮一下，佢話『咁咪好啦，你唔做嘅話呢，我哋搵第二個做呢個角色』！」

再談到婚姻生活，老公練海棠曾被拍到與妙齡少女出街，當年伍姑娘選擇原諒：「我係無嬲，我反而第一係諗下自己，呢件事發生一定有原因，自己有咩問題，大家商討囉，傾得埋就合，傾唔埋就分手！」由婚姻危機變轉機，現與老公練海棠會更加珍惜對方！

最後提到亡夫翁江培，伍姑娘表示，如果當年不是翁江培提議她選亞姐，好大可能已經走了另一條歪路，「我可能『華燈初上』咗！如果無支明燈點過我，我應該會行歪路多，做送上千萬溫柔的舞小姐！」問可會依然掛念亡夫？伍姑娘深情地說：「邊個對過我好嘅人，我係記在心裏面。翁生係我第一個明燈，亦都係我第一個丈夫，無血緣關係但係最親密嘅人，佢教我最多嘢，係我老師亦都係我丈夫，如果無佢教我點樣用第一張信用卡，我唔會去到今日咁有骨氣嘅伍詠薇！我係掛住你㗎，翁。所以我覺得啲人話前夫猝死是我生命裏面的遺憾，真係陰功呀！咩陰功啫，上天有好多嘢安排晒，我無悔第一段婚姻，令到我學識好多嘢，同埋係我真愛！」