香港文匯報訊（記者 梁靜儀）陳柏宇（Jason)、 梁諾妍（Inez）、趙祥誠（Ben）昨日出席商場暑期活動揭幕禮。活動上，Inez及Ben突然捧出蛋糕預祝Jason本月20日38歲生日，令Jason十分驚喜。Jason表示生日當日會在家中食飯慶祝，被讚保養得好，不似38歲的他，笑言歸功於生得細粒。

提到近日有粉絲豪擲百萬，於巴士車身及巴士站燈箱下廣告、租巨型廣告牌及於郵輪全新用LED燈為偶像慶生，問到他可想粉絲效法？Jason聞言即表示不想粉絲嘥錢：「當然唔買，我唔想佢哋嘥錢，因為我啲粉絲好多已結婚、生咗小朋友，有家庭負擔，留返啲錢傍身好，我唔鼓勵佢哋咁做，但我亦唔介意佢哋做。」問到愛女Abigail可鍾意睇明星？Jason爆囡囡最鍾意睇恐龍打交、整冬甩及蛋糕片等，問到可有看過其MV？他笑說沒有：「其實係冇專登播畀佢睇。」

準新娘Inez 將於周日與男友洪永城（Tony）結婚，她笑言近日都要忙於工作及籌辦婚禮，忙到周六才有時間放假整頭髮，故心情仍未緊張，她又爆未婚夫貪靚：「Tony除了日日敷面膜，又戒澱粉，仲話要買生髮洗頭水，希望周日可以擸頭，我唔介意買個假髮畀佢戴，佢開心就得，就算佢冇頭髮都得㗎！之前影結婚相，Tony總係覺得差在髮型唔靚，我只好讚佢其他部位囉，例如讚佢啲單眼皮都好單咁囉！」

Inez又解釋因疫情反覆才趕快結婚：「睇咗7月有幾個好日，因為現在酒店又放寬婚禮至50人，驚之後又縮返20人，幸好朋友都好錫我哋可以參與，但Tony媽咪身在台灣，到時我哋會視像斟茶。」

參加《全民造星III》出身的Ben，昨日於活動上表演，獲大班粉絲到場支持。