（香港文匯報記者 鄭治祖）如果食肆俾食環署停牌，但仍要扮無嘢，好難令消費者信得過喎。旺角黃店「火鍋撚」就係咁，因非法擴展營業範圍及屢次違反《食物業規例》，被暫時吊銷牌照14天，但「火鍋撚」就喺facebook發布消息話，佢係因「裝修」而停業，俾網民即場篤爆，又大讚食環署做法正確，唔可以俾食店非法擴張營業範圍。

食環署噚日發布新聞稿話，「火鍋撚」經營者因非法擴展營業範圍，屢次違反《食物業規例》，喺舊年6月及11月兩次被法庭定罪，共罰款6,000元。食環署就根據違例記分制記下持牌人30分，「火鍋撚」位於旺角染布房街5號閣樓14及15號舖及地下部分，就需要由噚日開始至下個月5日暫停營業。

「火鍋撚」霸地營業劣跡斑斑

食環署發言人回帶話，「火鍋撚」持牌人亦因為食物室唔乾淨、冇保持設備及用具清潔，同非法擴展營業範圍，喺舊年7月三次被法庭定罪，共罰款6,100元，被記下20分，喺去年9月仲被暫時吊銷牌照7天。

「火鍋撚」就選擇掩耳盜鈴，喺facebook繼續扮嘢呃人，聲稱旺角店停業14天係因為「內部裝修」云云。網民「Ho Anson」立即踢爆佢，又貼出食環署發言人嘅新聞稿，寸道：「裝咩修呀，只係藉口。」「Christy Lau」則贊同食環署暫時吊銷「火鍋撚」牌照：「早就應該要入面幾個單位改裝晒做舖頭。」「Josef Ho」亦讚道：「這是做得對的，太多食店非法擴展營業範圍了。」